Azərbaycan, Bakı, 7 oktyabr / Trend , müxbir A.Bədəlova/
ABŞ-ın Dövlət Enerji İnformasiya İdarəsi (EİA) 2010-cu ildə dünyanın neftə olan tələbatının sutkada 84,77 milyon barelədək artacağını proqnozlaşdırır. Ötən ay EİA-nın 2010-cu ilə olan proqnoz göstəricisi 84,58 milyon barel olub.
EİA-nın oktyabr hesabatında deyildiyinə görə, dünya iqtisadiyyatı 2009-cu ilin sonunda Asiya ölkələrinin İqtisadi Əməkdaşlıq və İnkişaf Təşkilatı (İƏİT) hesabına bərpa ediləcək. Bununla əlaqədar olaraq, EİA sonuncu rübdə dünyanın neftə olan tələbatının artacağını proqnozlaşdırır.
EİA-nın sentyabr hesabatında deyildiyinə görə, gələn il neftə olan tələbatın artımı, əsasən İƏİT-ə daxil olmayan ölkələrdə müşahidə ediləcək. Bu ölkələrdə neftə olan tələbat 2010-cu ildə sutkada 39,19 milyon barel təşkil edəcək.
İƏİT-ə daxil olan ölkələrdə EİA-nın proqnozuna görə, 2010-cu ildə neftə olan tələbat sutkada 45,59 barelədək artacaq.
EİA-nın hesabatında deyidiyi kimi, 2009-cu ilin birinci yarısında dünyada neftə olan tələbat sutkada 3,2 milyon barel enib. İlin üçüncü rübündə neftə olan tələbatın azalması sutkada 1,2 milyon barel təşkil edib.
2009-cu ilin yekununa görə, dünyada neftə olan tələbat 1,79 milyon barel azalaraq, sutkada 83,67 milyon barel olacaq. Bu il tələbatın ümumi həcminin 45,48 milyon bareli İƏİT ölkələrinin, 38,18 milyon bareli isə təşkilata daxil olmayan ölkələrin payına düşəcək.
EİA 2009-cu ildə dünyada neft tədarükünün sutkada 1,44 milyon barel azalaraq, sutkada 83,95 milyon barelə çatacağını proqnozlaşdırır. Proqnoza müvafiq olaraq, 2010-cu ildə dünyanın neft tədarükü üzrə göstərici 1,11 milyon barel artaraq, sutkada 85,06 milyon barelə çatacaq.
İƏİT ölkələri 2009-cu ildə sutkada 20,81 milyon barel neft, təşkilata daxil olmayan ölkələr isə 63,14 miyon barel neft tədarük edəcəklər. 2010-cu ildə İƏİT ölkələrinin tədarük həcmi sutkada 20,34 milyon barelədək azalacaq. Təşkilata daxil olmayan ölkələrdə isə tədarük həcmi sutkada 64,72 milyon barelədək artacaq.
Dövlət Enerji İnformasiya İdarəsi ABŞ-ın Enerji üzrə Departamentinin statistik agentliyidir, 1977-ci ildə Konqres tərəfindən yaradılıb.
Məqalə müəllifi ilə əlaqə ünvanı: [email protected]
