Azərbaycan, Bakı, 23 oktyabr / Trend , müxbir E.İsmayılov/
SOCAR Energy Georgia (Azərbaycan Respublikası Dövlət Neft Şirkətinin törəmə şirkəti) ARDNŞ-nin brendi altında noyabrda Tbilisidə növbəti yanacaqdoldurma məntəqəsini (YDM) istifadəyə verməyi planlaşdırır. Bu barədə cümə günü şirkətdən məlumat verilib.
"Bu ilin sonuna qədər beş-altı yeni YDM-in, gələn ay isə Tbilisidə növbəti YDM-in istifadəyə verilməsi planlaşdırılır", - mənbədən deyilib.
Oktyabrın 12-də Gürcüstan paytaxtı Tbilisidən ölkənin şərq regionlarına aparan yolda ARDNŞ-nin növbəti YDM-i istifadəyə verilib.
Hazırda Gürcüstanda 25 yanacaqdoldurma məntəqəsi fəaliyyət göstərir. Bir müddət əvvəl SOCAR Energy Georgia-nın rəhbəri Mahir Məmmədovun dediyinə görə, bu ilin sonuna YDM-lərin sayı 30-dan çox olacaq.
"Şirkətin məqsədlərindən biri də pərakəndə satış sahəsində lider mövqeyi tutmaqdır. Şirkət bu məqsədə bir neçə il ərzində çatmağı və Gürcüstanda YDM-lərin sayını 60-70-ə çadırmağı planlaşdırır", - Məmmədov bildirmişdi.
SOCAR Energy Georgia Gürcüstanda neft və neft məhsulları bazarında distribüterlik və marketinqlə məşğul olur.
SOCAR Georgia-nın həmtəsisçiləri ARDNŞ (51 faiz), Petro-Trans FZCO (32,7 faiz) və İvan Çxartişvilidir (16,3 faiz).
Məqalə müəllifi ilə əlaqə ünvanı: [email protected]
