Azərbaycan, Bakı, 24 oktyabr / Trend , müxbir E.İsmayılov/
Xəzər dənizinin Azərbaycan sektorunda "Ümid" perspektivli qaz-kondensat strukturunda ilk kəşfiyyat quyusunun qazılması çərçivəsində ARDNŞ (Azərbaycan Respublikası Dövlət Neft Şirkəti) tərəfindən 6,5 min metrlik layihə dərinliyinin təxminən 2,3 min metri qazılıb. Bu barədə ARDNŞ-dəki mənbədən şənbə günü məlumat verilib.
"Kəşfiyyat quyusunun qazılması davam edir, artıq təxminən 2300 metr qazılıb", - mənbədən deyilib.
"Kəşfiyyat quyusunun qazılmasına avqustda başlanılıb. Bu perspektivli struktur çətin geoloji və seysmik xüsusiyyətlərinə görə fərqlənir", - mənbədən bir müddət əvvəl bildirilmişdi.
Bu, ARDNŞ-nin son 15 ildə apardığı ilk müstəqil kəşfiyyat qazmasıdır. ARDNŞ geoloqları "Ümid" perspektivli strukturunda ehtimal edilən qaz ehtiyatını 300 milyard kubmetr, qaz-kondensat ehtiyatını isə 30-40 milyon ton həcmində dəyərləndirirlər.
Əvvəllər ARDNŞ kəşfiyyat quyularının da qazıldığı "Ümid-1" platformasının inşaatını başa çatdırıb. "Ümid-1" platforması tikintisi yarımçıq qalan "Çıraq-6" platformasının əsasında tikilib, proqram çərçivəsində ən iri obyekt hesab edilir, hündürlüyü 72 metrdir. Platforma dənizin 58 metr dərinliyində "Bulla dəniz" yatağının 15 kilometrliyində yerləşir. Ümumilikdə, platformada 6 qaz quyusunun qazılması planlaşdırılır.
Məqalə müəllifi ilə əlaqə ünvanı: [email protected]
