Azərbaycan, Bakı, 28 oktyabr / Trend , müxbir E.İsmayılov/
Yanvar-sentyabrda Türkiyə ərazisinə "Bakı-Tbilisi-Ceyhan" (BTC) boru kəməri vasitəsilə yanvar-avqust aylarında nəql edilən 194,4 milyon barel neftlə müqayisədə 214,5 milyon barel neft nəql edilib. Bu barədə Türkiyənin "Botaş" dövlət boru kəməri şirkətinin rəsmi saytında yayılan məlumatda deyilir.
Sentyabr ayında BTC vasitəsilə avqustda nəql edilən təxminən 25,3 milyon barel neftə nisbətdə təxminən 24,1 milyon barel neft nəql olunub.
Ümumilikdə, 2008-ci il ərzində BTC vasitəsilə Türkiyə ərazisinə 264 milyon barel neft nəql edilib.
BTC neft kəməri vasitəsilə əsasən Azərbaycanın Azəri Light markalı yüngül nefti və az həcmdə Qazaxıstanın "Tengiz" yatağında hasil edilən neft nəql olunur. Yanvar-sentyabr aylarında BTC vasitəsilə 1,3 milyon ton Tengiz nefti nəql olunub.
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycanın, 249 km-i Gürcüstanın, 1076 km-i isə Türkiyənin ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci ilin mayında başlanılıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
Sentyabrda Türkiyə ərazisi ilə İraq-Türkiyə boru kəməri vasitəsilə avqust ayında nəql olunmuş 15,8 milyon barel neftə nisbətdə 14,6 milyon barel neft nəql olunub. Ümumilikdə, yanvar-sentyabr ayları ərzində bu neft boru kəməri vasitəsilə təxminən 131 milyon barel neft nəql olunub.
Sentyabrda Türkiyə ərazisi ilə "Ceyhan-Qırıqqala" boru kəməri vasitəsilə avqustda nəql olunan təxminən 1,6 milyon barel neftə nisbətdə 2,1 milyon bareldən çox neft nəql olunub. Ümumilikdə, yanvar-sentyabr ayları ərzində "Ceyhan-Qırıqqala" boru kəməri vasitəsilə təxminən 15,3 milyon barel neft nəql olunub.
"Batman-Dördyol" boru kəməri vasitəsilə avqustda nəql olunmuş 964 min barel neftə nisbətdə sentyabrda 1,2 milyon barel neft nəql edilib. Yanvar-sentyabr ayları ərzində bu boru kəməri vasitəsilə təxminən 9,8 milyon barel neft nəql olunub.
Məqalə müəllifi ilə əlaqə ünvanı: [email protected]
