Özbəkistan, Daşkənd, 30 oktyabr / Trend , müxbir D.Əzizov/
Özbəkistan ərazisindən keçən "Türkmənistan-Çin" qaz magistralı tikintisinin tamamlanması noyabr ayına planlaşdırılıb. Məlumat "Özbəkneftqaz" Milli Holdinq Şirkəti (MHŞ) rəhbərliyindəki mənbədən daxil olub.
Mənbənin məlumatına görə, hazırda qaz kəmərinin böyük bir hissəsində yerüstü qaynaq işləri başa çatıb, yolun bəzi hissələrində isə hidravlik sınaqlara başlanılıb.
Dəyəri 2,975 milyard dollar, diametri 1067 millimetr, uzunluğu 530 kilometr və gücü 40 milyard kubmetr olan bu qaz kəməri üç vilayətin - Buxara, Qaşqadərə və Nəvainin ərazilərindən keçib Qazaxıstan ərazisindəki qaz nəqliyyatına çıxacaq.
Tikinti işlərinin operatoru 2008-ci ilin aprel ayında "Özbəkneftqaz" MHŞ və Çin Milli Neft-Qaz Korporasiyası /CNPC/ tərəfindən yaradılan Asia Trans Gas BM Özbəkistan ərazisindən keçən qaz kəmərinin layihələşdirmə, tikinti və istismarı üçün ilkin paritet hesab olunur.
Tikinti işlərini Asia Trans Gas BM ilə bağlanan müqavilələrə əsasən, China Petroleum Pipeline Bureau (CPP), China Petroleum Engineering & Construction Corporation (CPECC) və İsveçrənin Zeromax GmbH şirkəti aparır. Qəzlidən Qazaxıstana qədər olan qaz kəmərinin tikintisini Çin şirkətləri, Türkmənistandan Qəzliyə qədər Zeromax şirkəti, qaz kompressorları stansiyalarının tikintisini isə CPP və CPECC aparır.
Qaz kəməri və kompressor stansiyalarının istismara verilməsi 2009-cu ilin sonu, 2012-ci ilin əvvəlinə nəzərdə tutulub, ikinci qaz kəməri xətti və daha iki qaz kəməri stansiyasının da tikintisi nəzərdə tutulub.
Özbəkistan hökumətinin Çin tərəfi ilə razılığına əsasən, "Türkmənistan-Çin" qaz kəməri ilə həmçinin təxminən 10 milyard kubmetr həcmində Özbəkistan qazı Çinə ixrac olunacaq.
Özbəkistan təbii qazın hasilatına görə MDB ölkələri arasında ikinci yeri tutur və dünyanın 10 ən iri qaz hasilatı ölkələrinə daxildir. Hər il ölkədə 60 milyard kubmetrə yaxın qaz hasil olunur ki, bunun da bir hissəsi ixrac olunur.
Məqalə müəllifi ilə əlaqə ünvanı: [email protected]