Azərbaycan, Bakı, 12 yanvar / Trend , müxbir E.İsmayılov/
Azərbaycan qazının alqı-satqısına dair ARDNŞ (Azərbaycan Respublikası Dövlət Neft Şirkəti) və Rusiyanın qaz monopoliyaçısı "Qazprom" arasında imzalanan müqavilə qaz sahəsindəki çoxillik əməkdaşlığın əsasını qoyub. Bu barədə "Qazprom" ASC-nin rəhbəri Aleksey Miller deyib.
"Hesab edirəm ki, Azərbaycan və Rusiya arasında uzun illər boyunca qaz sahəsində uğurlu, vacib qarşılıqlı əməkdaşlığın əsasını qoymuşuq", - o deyib.
Millerin dediyi kimi, Azərbaycan və Rusiya arasında imzalanmış qaz müqaviləsi "Qazprom"-un bağladığı digər müqavilələr arasında analoqu olmayan müqavilədir.
"İmzalanmış müqaviləni fərqləndirən cəhət ondan ibarətdir ki, qaz alışının yuxarı həddi müəyyən olunmayıb. Biz Azərbaycanın tədarük edə biləcəyi qədər qaz alacağıq. "Qazprom"-un digər müqavilələri arasında buna bənzəri yoxdur ki, bu da bizim tərəfdaşlıq əlaqələrimizin yüksək səviyyədə olduğunu göstərir", - Miller qeyd edib.
Onun sözlərinə görə, ASC-nin Azərbaycan tərəfi ilə qaz üzrə müqaviləyə nail olunacağına şübhəsi yox idi, çünki Azərbaycandan qaz alışına rəqabət qabiliyyətli şərtlər təklif olunmuşdu.
Azərbaycan qazının Rusiyaya tədarükü bu il yanvarın 1-dən başlanıb.
ARDNŞ prezidenti Rövnəq Abdullayevin əvvəlcə dediyi kimi, Rusiyaya ilkin olaraq 500 milyon kubmetr qaz tədarükü planlaşdırılıb, lakin müqaviə nəticəsində tədarükün iki dəfə artırılması barədə qərar qəbul edilib.
Hökumətdəki mənbənin əvvəl dediyi kimi, proqnozlara əsasən 2010-cu ildə Rusiyaya təxminən 1,1 milyard kubmetr Azərbaycan qazı tədarük ediləcək.
Hazırda Azərbaycan Rusiyaya sutkada bir milyon kubmetr qaz ötürür, lakin yanvarın 15-dən etdibarən bu göstərici 1,5 milyon kubmetrədək artırılacaq.
Azərbaycan qazını Rusiyaya tədarük edən "Bakı-Mozdok" boru kəməri ildə beş milyard kubmetr qazötürmə qabiliyətinə malikdir. 2007-ci ilədək bu qaz kəməri vasitəsilə Azərbaycana 4,5 milyard kubmetr qaz idxal olunub. Lakin sonra Azərbaycan Rusiya qazının idxalından imtina edib.
Azərbaycan qazının Rusiyaya alqı-satqısına dair ortamüddətli (uzadılma imkanı olmaqla) müqavilə oktyabrın 14-də Bakıda ARDNŞ və "Qazprom" arasında imzalanıb. Bu müqavilə 2010-2014-cü illəri əhatə edir. Müqaviləyə əsasən, Azərbaycan tərəfi Rusiyaya ildə ən azı 500 milyon kubmetr qaz tədarük edəcək. Müqavilədə qaz tədarükünün dəyişmə həcmi göstərilməyib. ARDNŞ yarım il qarşı tərəfi tədarük edə biləcəyi həcm haqqında əvvəlcədən xəbərdar edəcək.
