Azərbaycan, Bakı, 21 yanvar / Trend /
Ötən ilin yanvar-noyabr aylarında Azərbaycana 1,6 milyon tona yaxın sement və sement klinkerləri idxal olunub ki, bu da 2008-ci ilin müvafiq dövrü ilə müqayisədə 11,5 faiz azdır. Bu barədə Dövlət Statistika Komitəsindən məlumat verilib. Bu dövr ərzində təxminən 63,4 milyon dollarlıq sement və sement klinkerləri idxal edilib ki, bu da ötən ilin müvafiq dövrü ilə müqayisədə 12,1 faiz azdır.
Yanvar-noyabr aylarında 577,2 min ton həcmində sement klinkerləri idxal edilib ki, bu da ötənilki göstəricidən 24,5 faiz azdır. İdxal edilən klinkerlərin ümumi məbləği 22,5 milyon dollardan artıq olub. Bu, ötən ilin göstəricisindən 4,5 faiz azdır.
Yanvar-noyabr ayları ərzində ölkəyə 1 milyon tondan artıq sement idxal edilib ki, bu da 2008-ci ildəki göstəricidən 2,1 faiz çoxdur. Bu dövrdə idxal edilən sementin həcmi 41 milyon dollar olub. Bu, keçən ilin göstəricisindən 15,8 faiz azdır.
