Azərbaycan, Bakı, 04 mart / Trend /
ARDNŞ (Azərbaycan Respublikası Dövlət Neft Şirkəti) Xəzər dənizinin Azərbaycan sektorundakı "Neft Daşları" yatağında altı quyunun mənimsənilməsini planlaşdırır. Bu barədə ARDNŞ-nin cümə axşamı yayılan məlumatında deyilir.
Məlumatda deyildiyi kimi, bu quyuların qazılması artıq başa çatıb. Quyuların altısı da 18 quyunun qazılması nəzərdə tutulan "Neft Daşları - 1146" platformasında yerləşir.
Geoloqların hesablamalarına əsasən, bu quyularda sutkalıq debet 180 ton təşkil edəcək.
Bu tədbirlər Azərbaycan Prezidentinin "Neft Daşları" yatağında neft hasilatı həcminin ildə 812 min tondan 1,2 milyon tona qədər (1,5 dəfə) artırılması barədə sərəncamına əsasən həyata keçirilir. ARDNŞ 2010-cu ilədək yataqda neft hasilatı həcminin artırılması üçün 78 yeni quyu qazacaq.
Bir müddət əvvəl ARDNŞ prezidenti Rövnəq Abdullayevin qeyd etdiyi kimi, "Neft Daşları" dəniz neft-qaz yatağının çıxarıla bilən qalıq ehtiyatları 182 milyon ton neftdən çoxdur. Bu yatağın geoloji ehtiyatları 365 milyon ton həcmində qiymətləndirilir. Mənimsənilmə üzrə mövcud layihəyə uyğun olaraq "Neft Daşları" yatağının işlənməsi 2035-ci ildə başa çatmalıdır.