Azərbaycan, Bakı, 5 mart / Trend /
ARDNŞ (Azərbaycan Respublikası Dövlət Neft Şirkəti) tərkibinə daxil olan Heydər Əliyev adına Bakı Dərin Özüllər Zavodunda məişət çirkab suları üzrə bioloji təmizləyici qurğu tikməyi planlaşdırır. Bu barədə ARDNŞ-nin Ekologiya İdarəsinin cümə günü yayılan məlumatında deyilir.
Bu yeni qurğunun gücü sutkada 1500 kub təşkil edir. Bununla bağlı hazırda "Neftqazelmitədqiqatlayihə" İnstitutu ilə müqavilə bağlanıb və layihə-axtarış işləri aparılır.
Zavodda istehsalat prosesi nəticəsində əmələ qələn tullantılar vaxtaşırı ərazidən çıxarılaraq müəyyən müəssisələrə təhvil verilir. Belə ki, metal tullantıların doğranması, yüklənməsi və daşınması üçün "SOCAR-ASM" MMC ilə bərk məişət, tikinti qalıqları və sənaye tullantılarının qəbulu, daşınması və xüsusi poliqonda zərərləşdirilməsi üçün isə "Azəri" firması ilə müqavilə bağlanıb.
