Azərbaycan, Bakı, 15 iyul /Trend/
Yanvar-iyun aylarında Azərbaycanın nəqliyyat sektorunda 94,2 milyon ton müxtəlif yüklər daşınıb ki, bu da 2009-cu ilin yanvar-iyun aylarında olduğundan 2,4 faiz çoxdur. Bu barədə Azərbaycan Dövlət Statistika Komitəsindən bildirilib. İlin birinci yarısında təsərrüfat subyektləri tərəfindən hüquqi və fiziki şəxslərə 1,9 milyard manatlıq xidmət göstərilib ki, bu da ötən ilin analoji dövr göstəricisindən 3,1 faiz çoxdur.
Yanvar-iyun aylarında daşınan yüklərin ümumi həcminin 73,5 faizi özəl sektorun payına düşür. Bu ilin yanvar-iyun aylarında yüklərin ümumi həcminin 50,5 faizi avtomobil nəqliyyatı ilə, 32,3 faizi boru kəmərləri, 11,4 faizi dəmiryol və 5,8 faizi dəniz nəqliyyatı ilə daşınıb.
Yanvar-iyun aylarında 656,6 milyon sərnişin daşınıb ki, bu da ötən ilin analoji dövr göstəricisindən 3,5 faiz çoxdur. Sərnişinlərin əsas hissəsi (85,3 faiz) avtomobil nəqliyyatı və metro ilə (14,2 faiz) daşınıb.
Dəmiryol nəqliyyatı ilə 10,7 milyon ton müxtəlif yüklər daşınıb ki, bu da 2009-cu ilin yanvar-iyun aylarında olduğundan 6,5 faiz çoxdur.
Dəniz nəqliyyatı ilə 5,5 milyon ton müxtəlif yüklər daşınıb. Bu, ötən ilin yanvar-iyun aylarında olduğundan 14,3 faiz azdır. Daşınan yüklərin üçdə ikisi neft və neft məhsullarının payına düşür. Daşınan yüklərin əsas həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-iyunda 4,8 milyon ton təşkil edib ki, bu da ötən ilin analoji dövr göstəricisindən 39,6 faiz çoxdur.
Avtomobil nəqliyyatı ilə 47,6 milyon ton yük daşınıb. Bu, ötən ilin yanvar-iyun aylarındakından 6,8 faiz çoxdur. Sərnişindaşımanın həcmi 560,1 milyon nəfər (artım 7,5 faiz) təşkil edib. Sərnişinlərin 96,5 faizi avtobuslarla, 3,5 faizi minik avtomobilləri ilə daşınıb.
Metropolitenlə sərnişindaşımanın həcmi 93,3 milyon nəfər təşkil edərək 15 faiz azalıb.
Yanvar-iyun aylarında hava nəqliyyatı ilə 436 min sərnişin daşınıb. Ötən ilin analoji dövründə bu rəqəm 554,6 min olub. Daşımaların həcminin 22,2 faizi özəl sektorun payına düşüb.
Bu ilin yanvar-iyun aylarında Avrasiya nəqliyyat dəhlizi ilə Azərbaycan ərazisindən 20,7 milyon ton yük daşınıb ki, bu da ötən ilin analoji dövr göstəricisindən 7,4 faiz çoxdur. Yanvar-iyun aylarında dəhliz çərçivəsində 83,3 milyon adam daşınıb ki, bu da 2009-cu ilin yanvar-aprel aylarında olduğundan 7,8 faiz çoxdur. Bu dəhlizlə daşınmalardan 127,9 milyon manat məbləğində gəlir əldə olunub.