Azərbaycan, Bakı, 22 iyul /Trend, müxbir T.Cəfərov/
Meksika körfəzindəki fəlakətdən sonra, İranın "Neft Xəzər" şirkəti ölkənin Milli Okeanoqrafiya İnstitutuna ""Neft Xəzər" böhran komitəsinin yaradılması məqsədilə müraciət edib. Bu barədə İRNA agentliyi institutun direktoru Vahid Çeqiniyə istinadən məlumat verib.
Çeqininin sözlərinə görə, "Neft Xəzər" şirkəti bu komitəni Xəzərdə mümkün fəlakətlərlə mübarizə üçün yaradır. "Hazırkı məqamda "Neft Xəzər" şirkəti "Əmir Kəbir" platforması vasitəsilə Xəzərdəki Neka limanından 250 kilometrlik məsafədə quyunun qazılması üzrə işlər həyata keçirir. Quyunun dərinliyi 1000 metrə yaxındır. Şirkət regionun və bu platformanın ekoloji təhlükəsizliyində maraqlıdır", - Çeqini bildirib.
2010-cu il aprelin 20-də Meksika körfəzində ВР-yə məxsus "Deepwater Horizon" neft platformasında partlayış baş verib. Bundan sonra o batıb və dənizə neft sızmağa başlayıb. Şirkət mütəxəssisləri yalnız iyulun 15-də neft sızmasının qarşısını almağa nail olublar.