Azərbaycan, Bakı, 23 iyul /Trend, müxbir E.İsmayılov/
Sentyabrda Avropa İttifaqı tərəfindən "Azerbaijan-Georgia-Romania Interconnector" qaz layihəsinin texniki-iqtisadi əsaslandırılmasının (TİƏ) hazırlanması üzrə tender elan edilməsi planlaşdırılıb. Layihə Azərbaycandan maye qazın Gürcüstanın Qara dəniz sahil ilə Rumıniyaya nəqli imkanlarını nəzərdə tutur. Bu barədə Gürcüstanın energetika naziri Aleksandr Xetaquri cümə günü Bakıda bildirib.
Onun sözlərinə görə, bu layihə çərçivəsində nazirlər səviyyəsində üçtərəfli saziş imzalanıb. İndi Rumıniyada, ilk növbədə, TİƏ-ni hazırlayacaq şirkətin yaradılması üzrə işlər gedir və artıq sonra şirkət Gürcüstan və Rumıniyada investisiyaların axtarışı və terminalların, eləcə də layihənin iştirakçısı olan hər üç ölkənin ərazisində müvafiq infrastrukturların inşası üçün istiqamətini dəyişəcək.
"Hələlik söhbət ondan gedir ki, bu ilin payızında şirkət təsis olunacaq və bu şirkət TİƏ-nin hazırlanması üçün maliyyələşmə cəlb edəcək. Aİ-nin çoxlu sayda qrantları var və Aİ bu layihənin TİƏ-ni maliyyələşdirə bilər. Şirkət haradasa sentyabradək bu maliyyəni cəlb edə, layihənin TİƏ-si üzrə tenderlər elan edə bilər", - Xetaquri bildirib.
"Azerbaijan-Georgia-Romania Interconnector" layihəsi çərçivəsində müştərək müəssisənin yaradılması prosesləri ilə məşğul olacaq üçtərəfli işçi qrupu yaradılıb.
Aprelin 13-də Azərbaycan, Rumıniya və Gürcüstan "Azerbaijan-Georgia-Romania Interconnector" layihəsi çərçivəsində "Maye qaz və onun nəqli sahəsində əməkdaşlıq haqqında" memorandum imzalayıb. Mayın 12-də tərəflər Tbilisidə bu layihənin reallaşdırılması üçün müştərək müəssisənin yaradılması haqqında protokol imzalayıblar.
Azərbaycanın maye qazının Rumıniyaya nəqli layihəsi maye qaz üçün iki terminalın tikintisini nəzərdə tutur. Onlardan birinin Gürcüstanda, digərinin isə Rumıniyada tikilməsi nəzərdə tutulur. İlkin məlumatlara görə, layihənin dəyəri 4-6 milyard dollar təşkil edəcək.
Layihə Azərbaycan qazının Gürcüstanın Qara dəniz sahillərindən qaz kəmərləri vasitəsilə nəqlini, orada xüsusi terminalda mayeləşdirilməsini və bundan sonra tankerlərlə Rumıniyanın Konstansa limanındakı terminala çatdırılmasını nəzərdə tutur. Sonra maye qaz təbii qaz halına salınacaq və ölkə ərazisində mövcud olan qaz infrastrukturlarından istifadə etməklə, Rumıniya və digər Avropa ölkələrinin tələbatının təmin edilməsinə yönəldiləcək.
