Azərbaycan, Bakı, 24 iyul /Trend, müxbir T.Cəfərov/
İranla Türkiyə arasında yeni qaz kəmərinin çəkilməsi İrana üç il ərzində Türkiyə və Avropaya sutkada 50-60 milyon kubmetr qaz nəql etməyə imkan verəcək. Bu barədə İran Neft Nazirliyinin saytı "Milli Qaz" Şirkətinin direktoru Cavad Ouciyə istinadən xəbər verir.
Dünən İran və Türkiyə İran qazının nəqli üçün yeni qaz kəmərinini tikintisi barədə saziş imzalayıblar.
"Türkiyə Avropaya İran qazını öz ərazisində yeni qaz kəmərinin inşası vasitəsilə nəql etməyə hazırlaşır. İki ölkə arasında müqavilə imzalanmaqla, bu istiqamətdə ilk addım atılıb", - Ouci bildirib.
Oucinin sözlərinə görə, İran "Milli Qaz" Şirkəti ASB şirkətinə tranzit xərcləri ödəməklə öz qazını Avropaya nəql edəcək. "Yeni qaz kəmərinin diametri 56 dyüm təşkil edəcək. Tikinti işləri 2014-cü ildə başa çatacaq", - Ouci deyib.
Onun sözlərinə görə, boru kəmərinin uzunluğu İranın Miyandoab şəhərindən Bazarqan buraxılış məntəqəsinə qədər 620 kilometr təşkil edəcək. Proqnozlara görə, layihənin ümumi dəyəri 980 milyon avrodan çoxdur. Layihədə Türkiyə şirkətinin payı 77, İran "Milli Qaz" Şirkətinin payı isə 23 faiz təşkil edir.
Onun sözlərinə görə, boru kəməri sutkada 110 milyon kubmetr qaz nəql etmək iqtidarında olacaq.