Azərbaycan, Bakı, 28 iyul /Trend, müxbir E.İsmayılov/
Yanvar-iyunda Türkiyə ərazisindən "Bakı-Tbilisi-Ceyhan" kəməri üzrə 136 milyon barel neft nəql edilib. Bu göstərici 2009-cu ilin yanvar-iyun aylarında 139,5 milyon barel təşkil edib. Bu barədə Türkiyənin "Botas" şirkətinin rəsmi intenet-saytında yerləşdirilən məlumatda deyilir.
Məlumatda qeyd olunduğuna görə, mayda Türkiyə ərazisi vasitəsilə BTC üzrə 23 milyon barel neft nəql olunub. Bu göstərici ötən ilin iyununda 25,9 milyon barel təşkil edib.
2009-cu ildə Türkiyə ərazisindən BTC vasitəsilə, təxminən, 285,5 milyon barel neft nəql edilib. Bu göstərici 2008-ci ildə 264,1 milyon barel olub. 2007-ci ildə bu göstərici 210 milyon bareli ötüb.
BTC neft kəmərinin ümumi uzunluğu 1768 km təşkil edir. Bunun 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir.
Boru kəmərinin tikintisinə 2003-cü ilin mayında, onun neftlə doldurulmasına isə 2005-ci il mayın 18-də başlanılıb.
"BTC Co"nun səhmdarları bunlardır: "bp" (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
Yanvar-iyunda Türkiyə ərazisindən İraq-Türkiyə boru kəməri vasitəsilə, təxminən, 72 milyon barel neft nəql edilib. İyunda bu göstərici 11,8 milyon barel, mayda isə 13,3 milyon barel olub. Ötən il bu boru kəməri vasitəsilə 167,6 milyon barel neft nəql edilib. 2008-ci ildə bu göstərici 135,5 milyon barel təşkil edib.
"Ceyhan-Kirikqala" boru kəməri ilə yanvar-iyunda Türkiyə ərazisindən 7,75 milyon barel neft nəql edilib. İyunda bu göstərici 1,85 milyon barel, mayda isə 1,8 milyon barel təşkil edib. 2009-cu ildə "Ceyhan-Kirikqala" üzrə ümumilkdə, təxminən, 20,2 milyon barel neft nəql edilib. 2008-ci ildə bu göstərici 21,4 milyon barel təşkil edib.
Yanvar-iyunda "Batman-Dördyol" boru kəməri vasitəsilə, təxminən, 6,2 milyon barel neft nəql edilib. İyunda bu göstərici 710 min barel, mayda isə 780 min barel neft təşkil edib. Ötən il bu neft kəməri vasitəsilə 12,2 milyon barel neft nəql olunub. 2008-ci ildə bu göstərici 11,1 milyon barel təşkil edib.
