Azərbaycan, Bakı, 4 avqust /Trend/
"BP-Azərbaycan" şirkəti Xəzər dənizinin Azərbaycan sektorunda istismarda olan yataqlarda ətraf mühitin qiymətləndirilməsi və dəniz hövzəsində bioloji resursların öyrənilməsi məqsədi ilə ekoloji monitorinq keçirir. Bu barədə ARDNŞ-nin çərşənbə günü yayılan məlumatında deyilir.
Monitorinqdə Ekologiya İdarəsi tərəfindən Ekoloji Tədqiqatlar Ekspedisiyasının əməkdaşları iştirak edirlər. Məlumatda qeyd olunduğuna görə, tədqiqatlar iyulun 26-dan etibarən başlamaqla, avqustun 26-dək davam edəcək.
Monitorinq zamanı əsas diqqət təhlükəsizlik təlimləri, fərdi mühafizə vasitələrindən düzgün istifadə qaydaları və monitorinqdə istifadə olunan cihaz və avadanlıqların işə hazırlanması prosesi, nümunələrin götürülməsi, konservasiyası, ilkin emalı, qablaşdırılması və kodlaşdırılması, siyahı üzrə yoxlanılması və laboratoriyaya təhvil verilməsi işlərinə yönəldiləcək.
