Azərbaycan, Bakı, 13 avqust /Trend/
Yanvar-iyul aylarında "Bakı-Tbilisi-Ceyhan" (BTC) boru kəməri ilə 21,8 milyon ton neft nəql edilib. Bu göstərici 2009-cu ilin yanvar-iyul aylarında 22,1 milyon ton olub. Bu barədə Azərbaycan Dövlət Statistika Komitəsinin məlumatında deyilir.
2009-cu il ərzində ümumilikdə BTC vasitəsilə 2008-ci illə müqayisədə (32,8 mln ton) 38,2 mln ton neft nəql olunub.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci ilin mayın 18-də başlanılıb.
BTC-nin səhmdarları bp (30,1 faiz), "AzBTC" (25 faiz), "Chevron" ( 8,90 faiz), "Statoil" (8,71 faiz), TPAO (6, 53 faiz), "Eni" (5 faiz), "Total" (5 faiz), "Itochu" (3,40 faiz), "Inpex" (2,50 faiz), "ConocoPhilips" (2,50 faiz) və "Hess" (2,36 faiz) şirkətləridir.
Yanvar-iyul aylarında Cənubi Qafqaz boru kəməri vasitəsilə (Bakı-Tbilisi-Ərzurum) 3,2 milyard kubmetr qaz nəql olunub ki, bu da ötən ilin analoji dövrünün göstəricisinə uyğundur.
2009-cu ildə "Bakı-Tbilisi-Ərzurum" boru kəməri ilə 2008-ci illə müqayisədə (4,7 milyard kubmetr) 5,2 milyard kubmetr qaz nəql olunub.
"Bakı-Tbilisi-Ərzurum" kəmərinin uzunluğu (Cənubi Qafqaz boru kəməri) 700 kilometrdən çoxdur. Buna görə də Xəzər dənizinin Azərbaycan sektorunda "Şahdəniz" qaz-kondensat yatağında hasil olunan qaz kəmər vasitəsilə nəql olunur. Qaz Gürcüstan və Türkiyəyə də daşınır. Qazın alıcısı qismində Azərbaycan da çıxış edir.
