Azərbaycan, Bakı, 2 oktyabr /Trend, müxbir E.İsmayılov/
"Interconnector Turkey-Greece-Italy" (ITGI) qaz kəməri layihəsi Azərbaycan qazı uğrunda rəqabət aparmaq üçün rəqibi "Nabukko" qaz kəməri layihəsindən daha yaxşı vəziyyətdədir. Bu barədə cümə günü İtaliyanın "Edison" şirkətinin icraçı vitse-prezidenti Roberto Poti bildirib. Məlumatı "Bloomberg" agentliyi yayıb.
ITGI layihəsi Yunanıstanın "Depa SA" və Türkiyənin "Botaş" Dövlət boru kəməri şirkəti tərəfindən Azərbaycan qazının Türkiyə və Yunanıstan vasitəsilə İtaliyaya tədarükü üçün işlənib hazırlanır.
"Uzunmüddətli perspektivdə ITGI və "Nabukko" 2016-cı və ya 2017-ci ildən başlayaraq səkkiz milyard kubmetr Azərbaycan qazının alınması üçün yarışacaqlar", - Poti bildirib.
Onun sözlərinə görə, ITGI üçün qaza olan zəmanəti təmin etmək asandır, nəinki "Nabukko" üçün. ITGI İtaliyaya ildə 8-9 milyard kubmetr, Yunanıstana 2-9 milyard kubmetr qaz nəql edəcək. "Layihə Türkiyədəki mövcud qaz xətlərindən istifadəni, Yunanıstan və Adriatik dənizindən dəyəri bir milyard avrodan az olan iki xəttin inşasını nəzərdə tutur", - Poti deyib.
"Şübhəsiz ki, ITGI "Nabukko"dan daha az tranzit dəyərinə malikdir və Azərbaycan qazının alınmasına zəmanət təmin edildikdən sonra tikiləcək", - o qeyd edib.
ITGI qaz kəmərinin planlaşdırılan buraxılış qabiliyyəti ildə 11,8 milyard kubmetr qaz təşkil edir. Bu həcmdən 3,6 milyard kubmetri Yunanıstan, yerdə qalan hissəni isə İtaliya almaq niyyətindədir. ITGI qaz kəməri Xəzər regionundan və Yaxın Şərqdən Aİ ölkələrinə qaz tədarükünü nəzərdə tutan "Cənub dəhlizi" çərçivəsindəki layihələrdən biridir.
"RWE Supply&Trading"-n biznesin inkişafı departamentinin rəhbəri Ceremi Ellisin bindan əvvəl bikldirdiyinə görə, IGI qaz kəmərinin (Trükiyə, Yunanıstan və İtaliya arasındakı ITGI boru kəmərinin bir hissəsi) "Nabukko" qaz kəmərinə birləşdirilməsi qazın Trükiyədəki qaz kəmərləri sistemindən yan ötməklə Yunanıstan və İtaliya bazarlarına tədarükünə imkan verir. Yunanıstanın DEPA şirkəti də IGI-nin "Nabukko"nun həyata keçirilməsinin birinci mərhələsi olması barədə ideyanın irəliləməsi ilə bağlı təkliflə çıxış edir.
Dəyəri 7,9 mlrd. avro olan "Nabukko" qaz kəmərinin tikintisinə 2011-ci ildə başlamaq nəzərdə tutulur. Maksimum gücü ildə 31 milyard kubmetr olan qaz kəməri ilə ilk qaz tədarükünə 2015-ci ildə başlanacaq. Qaz kəməri ilə Azərbaycandan, eləcə də Türkmənistan və İraqdan qaz ixracı nəzərdə tutulur.
