Azərbaycan, Bakı, 7 oktyabr /Trend, müxbir E.İsmayılov/
Xəzərin Azərbaycan sektorundakı "Azəri-Çıraq-Günəşli" yataqlar blokunda dərin qaz yataqlarının işlənib hazırlanması ilə bağlı danışıqlar davam etdirilir. Bu barədə cümə axşamı ARDNŞ-nin yüksəkvəzifəli nümayəndəsi deyib.
"Biz artıq il yarımdır ki, BP şirkəti ilə "Azəri-Çıraq-Günəşli" blokunun dərin hissəsində qaz ehtiyatlarının işlənib hazırlanması məsələsi ilə bağlı danışıqlar aparırıq. Bu qaz ehtiyatlarının işlənib hazırlanması məsələsi dondurulmayıb, gündəmdədir", - ARDNŞ nümayəndəsi bildirib.
"AÇG" yataqlar blokunda dərin qaz ehtiyatları 300-400 milyard kubmetr həcmində qiymətləndirilir.
Dərin qaz ehtiyatlarının işlənib hazırlanmasının yeni hasilatın pay bölgüsü (PSA) müqaviləsi çərçivəsində həyata keçirilməsi planlaşdırılır.
1994-cü ildə Azərbaycanla imzalanan layihəyə görə, BP və onun "AÇG" layihəsi üzrə tərəfdaşları neft horizontlarının "Fasilə" lay dəstinədək işlənməsi hüququna malikdirlər. Eyni zamanda, müqavilədə qeyd edildiyi kimi, aşağı horizontların işlənməsi başqa sazişin predmetidir.
Azərbaycanın digər dəniz yataqları ilə analogiyaya görə iddia etmək olar ki, "Fasilə" lay dəstindən sonra məhz Nadkirmakinsk, Podkirmakinsk və Qala lay dəstləri də karbohidrogenlərə malikdirlər.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).