Azərbaycan, Bakı, 2 dekabr /Trend/
"Azərenerji" SC "Mingəçevir SES Silsiləsi"nin yenidən qurulması çərçivəsində Çinin SNEEC şirkətinin istehsalı olan avadanlıq alacaq. Bu barədə SC-nin məlumatında deyilir.
Ötən əsrin ortalarında istismara verilən "Mingəçevir SES Silsiləsi"nin ikinci hissəsini "Varvara" SES təşkil edir. Silsilənin uzunmüddətli istismarı onun vaxtaşırı olaraq yenilənməsi zərurətini yaradır. Azərbaycan müstəqillik qazandıqdan sonra altı hidroaqreqatdan dördü yenidən qurulub.
Məlumatda deyildiyinə görə, SC turbin hidroaqreqatlar alacaq.
Yenidənqurma işləri çərçivəsində üç saylı hidroaqreqat tam sökülüb. Hazırda bir saylı hidroaqreqatda bu proses davam etdirilir. Bununla yanaşı, 200 MVA-lıq bir transfomatorun yenilənməsi planlaşdırılıb. Bundan sonra silsilənin gücü indiki 360 meqavatdan 420 meqavata çatdırılacaq.
Məlumata əsasən, hazırda baş idarətmə şitinin yeni əraziyə köçürülməsi məqsədilə inşa olunacaq binanın təməlinin qazılmasına başlanıb. 110, 220 və 330 kV-lik yarımstansiyalar da tamamilə yenidən qurulacaq, paylayıcı qurğuda avadanlıqların müəyyən hissəsi yenilənəcək. Avadanlıqlar Fransanın "Areva" şirkətindən alınır. Tikinti-quraşdırma işlərini AZENCO ASC aparacaq.