Azərbaycan, Bakı, 27 dekabr /Trend, müxbir E.İsmayılov/
2011-ci ilin birinci yarısında Azərbaycan qazının Türkiyəyə satışı və tranziti üzrə müqavilələr imzalanacaq. Bu barədə bazar ertəsi ARDNŞ (Azərbaycan Respublikası Dövlət Neft Şirkəti) prezidenti Rövnəq Abdullayev məlumat verib.
Bundan əvvəl Azərbaycan və Türkiyə "Şahdəniz" yatağının işlənməsinin birinci və ikinci mərhələsində qazın dəyəri, eləcə də Azərbaycan qazının Türkiyə ərazisindən tranzitinin şərtləri məsələsində qarşılıqlı anlaşma haqqında memorandum imzalayıblar.
Abdullayevin sözlərinə görə, hazırda ARDNŞ və Türkiyənin "Botaş" şirkətinin mütəxəssisləri sənədlərin hazırlanması üzrə danışıqlar aparırlar.
ARDNŞ rəhbəri "Şahdəniz" yatağının işlənməsinin ikinci mərhələsi çərçivəsində qaz satışı məsələsinə toxunaraq bildirib ki, ARDNŞ qaz alışı barədə bütün təkliflərə baxmağa hazırdır.
"Bu məsələdə əsas məqsəd qazın yüksək qiymətlə satılmasıdır", - Abdullayev bidlirib.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: bp (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
