...

Avropaya qaz tədarükünün şaxələndirilməsinə yönəldilən boru kəməri layihələri birləşdirilməlidir

Energetika Materials 26 Yanvar 2011 17:45 (UTC +04:00)

Azərbaycan, Bakı, 26 yanvar /Trend, müxbir E. İsmayılov/

Avropa Rusiyadan tədarükün şaxələndirilməsini təmin etmək məqsədilə rəqabət aparan üç qaz kəmərini birləşdirməlidir. Bu barədə çərşənbə günü "Dow Jones"a "Nabukko" qaz kəmərinin tikitisi layihəsinin PR-məsləhətçisi,"Joschka Fischer&Company" şirkətinin rəhbəri Yoşka Fişer bildirib.

Onun sözlərinə görə, "Nabukko" və rəqabət aparan boru kəməri layihələri bir layihədə birləşməkdən fayda əldə edəcəklər.

"Biz bir neçə Avropa layihəsini bir layihədə birləşdirməyə cəhd göstərməliyik. Brüsseldə də bunula bağlı güclü istək var və hesab edirəm ki, bu yerinə yetirilə bilər", - Fişer bildirib.

Həmçinin Fişer "Nabukko" tərəfdaşları ilə potensial tədarükçülər arasında danışıqlara istinadən bildirib ki, Aİ-nin dəstəklədiyi "Nabukko" qaz kəmərinin taleyi, çox güman ki, gələn ay müəyyən olunacaq.

Avropaya tədarük olunan qazın şaxələndirilməsini nəzərdə tutan "Cənub dəhlizi"nin tərkibinə dörd boru kəməri layihəsi -"Nabukko", ITGI (Türkiyə-Yunanıstan-İtaliya), Transadriatik qaz kəməri (TAP) və "Bəyaz axın" daxildir. Dəfələrlə bir neçə boru kəməri layihəsinin, məsələn, "Nabukko" və ITGI-nin birləşdirilməsi ideyası səsləndirilib.

Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2012-ci ilə təyin edilib. İlk tədarüklərə 2015-ci ildə start veriləcək.

"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.

"Nabukko" qaz kəmərinin uzunluğu 2730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.

Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin BOTAŞ və Almaniyanın RWE şirkətləridir. Onların hər biri bərabər paya - 16,67 faiz paya malikdir.

Xəbər lenti

Xəbər lenti