Azərbaycan, Bakı, 17 fevral /Trend, müxbir V.Javoronkova/
Asiya İnkişaf Bankı (AİB) Türkmənistan-Əfqanıstan-Pakistan-Hindistan (TAPI) qaz kəməri layihəsinin bütün iştirakçı ölkələr üçün uğurlu olmasına qəti şəkildə inanır. Bu barədə cümə axşamı Trend-ə AİB-in beynəlxalq münasibətlər şöbəsinin KİV ilə əlaqələr üzrə mütəxəssisi Filip Vud bildirib.
Cümə axşamı Aşqabadda TAPI qaz kəməri layihəsinin texniki işçi qrupunun iclası başa çatıb. Tədbirə layihədə iştirakda maraqlı olan ölkələrin ekspertləri ilə yanaşı, AİB nümayəndələri də dəvət edilib. İclasda 2011-ci ilin birinci yarısında imzalanması planlaşdırılan və layihənin həyata keçirilməsinə başlamağa icazə verən Türkmənistan qazının alqı-satqısı haqqında sazişin və digər sənədlərin hazırlanması məsələsi yer alıb.
"Bu [TAPI layihəsi], regionda zəngin enerji resurslarına, Asiyada, Yaxın Şərqdə və onların hüdudlarından kənarda tez inkişaf edən bazarlara malik ölkələrin birləşdirilməsi yolu ilə ticarətin və enerji təhlükəsizliyinin genişləndirilməsi üçün nadir imkandır", - Vud bildirib.
Onun sözlərinə görə, TAPI-nin gələcəkdə maliyyələşdirilməsinə gəldikdə, layihənin dörd iştirakçı ölkəsi indi onun inkişaf planı üzərində çalışır və oraya maliyyələşməyə dair konkret məsələlərin müəyyən edilməsi daxil olacaq.
Vudun sözlərinə görə, TAPI iştirakçısı olan ölkələr maliyyələşdirmənin formalaşması prosesini, eləcə də qaz kəmərinin memarı və idarəedicisi qismində kimi görmək istədiklərini müstəqil şəkildə müəyyən edəcəklər. AİB öz növbəsində bu məsələdə onların qərarlarına hörmətlə yanaşacaq.
Vud deyib ki, AİB üçüncü tərəfi bu layihədə iştiraka cəlb etməyə cəhd etmir.
Onun sözlərinə görə, ikitərəfli və qrup müzakirələri aparılır və AİB ehtimal edir ki, yaxın aylarda müxtəlif tərəflər arasında çoxlu sayda görüşlər keçiriləcək.
Bank nümayəndəsinin sözlərinə görə, layihənin investisiyalaşdırılması və maliyyələşdirilməsi üzrə konkret planlar hazır olanda vəsaitin toplanması strukturu razılaşdırılacaq və vəsait yığımına başlanacaq. Çox güman ki, AİB-ə layihənin qismən maliyyələşdirilməsi təklif olunacaq ki, buna da müəyyən olunmuş qaydada baxılacaq.
TAPI-nin uzunluğu 1 700 kilometr, layihə üzrə gücü isə ildə 33 milyard kubmetr təbii qaz təşkil edə bilər. Layihənin xammal bazası Türkmənistanın "Dövlətabad" yatağı ilə yanaşı, 22 trilyon kubmetrlik qaz ehtiyatlarına malik "Yeloten" yatağı da olacaq.
Layihə üzrə danışıqlar üçün baza sənədi 2010-cu ilin dekabrında Aşqabadda TAPI iştirakçısı olan ölkələr arasında imzalanan dövlətlərarası və çərçivə sazişidir.
