Azərbaycan, Bakı, 12 mart/Trend, müxbir A.Bədəlova/
Azerbaijan-Georgia-Romanian Interconnector (AGRI) tədarük marşrutlarının şaxələndirilməsi baxımından həm Macarıstan, həm də bütün Avropa üçün mühüm layihədir. Bu barədə Macarıstanın MVM şirkətinin icraçı direktorunun strategiya üzrə müavini Zalan Bakş deyib. Şirkət bu yaxınlarda layihə çərçivəsində Rumıniyada yaradılan birgə müəssisənin tərkibinə daxil olub.
"Macarıstan hökuməti tərəfindən tam dəsətəyə malik olmaqla biz bəyan edə bilərik ki, bu, qaz tədarükünün təhlükəsizliyinin artırılması və onların marşrutlarının Azərbaycandakı karbohidrogenlər hesabına şaxələndirilməsi baxımından həm Macarıstan, həm də bütün Avropa üçün vacib layihədir", - Trend-ə elektron poçtla Bakş bildirib.
AGRI layihəsi Azərbaycanın maye qazının Gürcüstana Qara dəniz vasitəsilə Rumıniya və Mərkəzi Avropanın digər ölkələrinə nəqlini nəzərdə tutur.
Fevralın 14-də Azərbaycan, Gürcüstan, Rumıniya və Macarıstan AGRI layihəsinin həyata keçirilməsi üzrə protokol imzalayıblar. Sənəddə AGRI layihəsinin TİƏ-nin 2012-ci ilin aprelindən gec olmayaraq başa çatdırılmasının zəruriliyi göstərilib. Həmçinin, TİƏ-nin hazırlanması üçün zəruri maliyyələşdirmənin cəlb edilməsinə layihədə iştirak edən şirkətlərə dəstək göstərilməsi zəruriliyi də qeyd olunub. Sənəddə qeyd olunur ki, AGRI çərçivəsində işlərin gücləndirilməsi Azərbaycan qazının Avropa bazarlarına nəqlinin nisbətən daha qısa marşrutunun tapılmasını, Rumıniya-Macarfıstan (Arad-Şeqed) interkonnektorunun yaradılmasını nəzərdə tutur.
Bundan əvvəl Rumıniyada AGRI layihəsi çərçivəsində yaradılan Birgə müəssisə yeni layihənin texniki-iqtisadi əsaslandırması (TİƏ) və maliyyələşdirmə mənbələrinin axtarışı ilə məşğul olacaq.
Şirkətin iştirakçıları Rumıniyanın ROMGAZ, Gürcüstanın neft-qaz korporasiyası, ARDNŞ və MVM şirkətləridir. BM-nin iştirakçılarının hər biri 25 faizlik iştirak payına malikdir.
Bakşın sözlərinə görə, MVM şirkəti AGRI layihəsi üzrə BM-in tərkibinə nizamnamə kapitalını 50 000 avro artırmaq yolu ilə daxil olaraq, 25 faizlik iştirak payı əldə edib.
Onun sözlərinə görə, yeni layihənin texniki-iqtisadi əsaslandırmasının hazırlanamsı üzrə işlərə artıq başlanılıb.
"İşlər layihə səhmdarları ilə ilkin qrafikdə razılaşdırıldığı kimi artıq başlayıb", - Bakş qeyd edib.
Bakş deyib ki, TİƏ-nin gedişində layihənin dəyəri müəyyən ediləcək.
Bundan əvvəl Trend-ə Macarıstan Milli İnkişaf Nazirliyi yanında dövlət katibin iqtisadiyyat və iqlimin dəyişiklikləri üzrə müavini Peter Olajosun dediyinə görə, layihənin TİƏ-si 2012-ci ilin yayına hazır olacaq.
Layihə Azərbaycan qazının Gürcüstanın Qara dəniz sahilində qaz kəməri üzrə nəqlini nəzərdə tutur ki, bu qaz da xüsusi terminalda mayeləşdirilərək, tankerlərlə Rumıniyanın Konstansa limanı terminalında nəql olunacaq. Gələcəkdə maye qaz təbii qaz halına gətirilərək, ölkə ərazisində mövcud olan qaz infrastrukturu vasitəsilə Rumıniya və digər Avropa ölkələrinin qaz tələbatını ödəmək üçün istiqamətlənəcək.
AGRI layihəsinin gücü üç variantda nəzərdə tutulur - ildə iki milyard kubmetr qaz, beş milyard kubmetr və səkkiz milyard kubmetr. İlkin məlumatlara görə, layihənin gücündən asılı olaraq, onun dəyəri 1,2 milyardla 4,5 milyard avro arasında dövr edir.