Azərbaycan, Bakı, 29 mart /Trend, müxbir V.Javoronkova/
Ərəb dünyasında baş verən hadisələr qaz idxalçılarının Xəzər regionunun resurslarına marağını artıraraq, alternativ enerji resursları mənbələrini axtarmağa məcbur edə bilər. Mərkəzi Asiya üzrə alman eskepert Ştefan Mayster bu fikirdədir.
Son aylar əksər Yaxın Şərq və Şimali Afrika ölkələri kütləvi xalq etirazlarına bürünüb. Üsyanlar artıq hakim rejimlərin Misir və Tunisdə çökməsinə gətirib çıxarıb. Hazırda iğtişaşlar xüsusilə Yəmən, Suriya və Liviyada davam edir. Hökumət əleyhinə çıxışlar Əlcəzair, İraq, İordaniya, Mərakeş, Omanda da olub. Liviyadakı vəziyyətə beynəlxalq qüvvələr müdaxilə edib.
Ərəb ölkələri dünya bazarına mühüm enerji resursları tədarükçüsüdür və bu ölkələrdəki hadisələr artıq neft və qaz bazarının vəziyyətinə öz təsirini göstərib.
Ekspertin sözlərinə görə, karbohidrogenlər bazarında vəziyyəti tam qiymətləndirmək üçün ərəb dünyasında, xüsusilə də iri enerji resursları tədarükçüsü olan Səudiyyə Ərəbistanındakı hadisələrin gələcək inkişafını, eləcə də mühüm tədarükçü olan Liviyadakı vəziyyətin nə ilə qurtaracağını gözləmək lazımdır.
"İndi hadisələrin Xəzər regionunun enerji resurslarına köklü şəkildə təsir edəcəyi barədə danışmaq hələ ki tezdir, lakin digər tərəfdən vəziyyət alıcıların alternativ enerji mənbələrinin və onların nəqli yollarının axtarışına marağını artırır", - Trend-ə elektron poçtla Mayster bildirib.
Onun sözlərinə görə, indi Avropa, Çin, Hindistan şirkətlərinin yeni resurs mənbələrinin axtarışına yönələn marağını müşayiət etmək mümkündür.
"Bu, Xəzər regionu resurslarına, daha dəqiq desək, Türkmənistan və Azərbaycandan olan resurslara iri investisiya həcmini cəlb etmək və boru kəmərlərinin yaradılması məsələsinə siyasi dəstək əldə etmək üçün potensial verə bilər", - Mayster qeyd edib.
Onun fikrincə, elə təəssürat yaranır ki, bu məsələ ilə bağlı debatlara tezliklə start veriləcək.
"Lakin hamıya məlumdur ki, enerji layihələrinin həyata keçirilməsinə nə qədər vaxt lazım olur, onların dəyəri necə yüksəkdir, bu layihələri inkişaf etdirmək üçün nə qədər vaxt lazımdır", - ekspert hesab edir.
"Doğrudan da perspektivdə Xəzər regionunun enerji resurslarına marağın artması haqqında danışmaq olar. Bu barədə Avropa şirkətlərinin "Nabukko" layihəsinə olan marağının artmasını təhlil edərək fikir yürütmək olar, lakin istənilən halda ərəb dünyasında baş verənləri qiymətləndirmək üçün vaxt lazımdır", - o vurğulayıb.
