Azərbaycan, Bakı, 2 aprel /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) və NIGEC (İranın Milli Qaz İxracı Şirkəti) Azərbaycan qazının İrana tədarükü üzrə uzunmüddətli müqavilənin hazırlanmasına dair işlər görür. Trend-in məlumatına görə, bu barədə şənbə günü şirkətin prezidenti Rövnəq Abdullayev bildirib.
Onun sözlərinə görə, hazırda ARDNŞ və İran mütəxəssisləri Azərbaycan qazının İrana əlavə həcmlərinin tədarükü üzrə danışıqları davam etdirirlər. Danışıqlar başa çatdıqdan sonra tərəflər uzunmüddətli müqavilə məsələsinə keçəcəklər.
ARDNŞ və NIGEC yanvarın 12-də Bakıda Azərbaycan qazının İrana tədarükü haqqında uzunmüddətli müqavilə imzalayıblar. Beş il müddətinə imzalanan müqaviləyə görə, 2011-ci ildə Azərbaycan İrana bir milyard kubmetr qaz tədarük edəcək, sonrakı illərdə isə bu həcm artırılacaq.
Müqaviləni ARDNŞ prezidenti Rövnəq Abdullayev və NIGEC-in baş direktoru Cavad Oci imzalayıb.
Azərbaycan və İranı ümumi uzunluğu 1474,5 kilometr - 296,5 kilometri Azərbaycan ərazisində yerləşən Qazı Məhəmməd-Bind-Biand qaz kəməri əlaqələndirir. Bu marşrut 1971-ci ildə istismara verilən Qazax-Astara-İran boru kəmərinin qoludur. Bu istiqamətində üç kompressor stansiyası - Qazı Məhəmməd, Ağdaş və Qazax stansiyaları tikilib.
