Azərbaycan, Bakı, 4 aprel /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) şirkətin nisbətən daha iri həcmdə neft və qaz hasil etdiyi Azərbaycanın "Günəşli" dəniz yatağının dayazsulu hissəsinin inkişaf proqramını təsdiqləyib. Bu barədə Trend-ə şirkətin yüksək vəzifəli nümayəndəsi məlumat verib.
"Bundan əvvəl hazırlanmış beşillik plan artıq təsdiqlənib", - ARDNŞ nümayəndəsi bildirib.
Onun sözlərinə görə, proqramın əsas məqsədi yataqda hasilatın səviyyəsinin saxlanmasıdır. Proqram 2011-2015-ci illəri əhatə edir.
Bir müddət əvvəl ARDNŞ-dəki digər mənbənin məlumatına görə, proqram yeni platformaların tikintisi və mövcud olanların genişləndirilməsi, yeni quyuların qazılmasını nəzərdə tutur.
O deyib ki, 2011-ci ildə şirkət qarşısında qoyulan məqsədlərdən biri yeni platformaların tikilməsi və artıq mövcud olanların təmiri, boru kəmərlərinin çəkilməsi və "Günəşli" və "Neft Daşları" yataqlarında yeni quyuların qazılmasıdır.
"Günəşli" yatağı "28 May" NQÇİ-nin balansındadır.
"Günəşli" yatağının dayazsulu hissəsi ARDNŞ-nin şəxsi vəsaitləri, "Azəri-Çıraq-Günəşli" yataqlar blokunun tərkibindəki dərinsulu hissə isə xarici şirkətlər konsorsiumu ilə birgə işlənilir.
