Azərbaycan, Bakı, 25 iyul /Trend, müxbir E.İsmayılov/
İlin birinci yarısında Azərbaycan Respublikası Dövlət Neft Fondu (ARDNF) Fondun investisiya portfelinin qısamüddətli alətlərdə yerləşdirilməsi siyasətini davam etdirib. Beş il müddətinə qoyulan vəsaitlərin payına aktivlərin 96,74 faizi düşür. Fondun investisiya portfelinin ümumi həcmi 30,348 milyon dollar, yaxud ARDNF-in aktivlərinin 99,97 faizi təşkil edir.
ARDNF-in bazar ertəsi yaydığı məlumata görə, Fondun investisiya portfelinin 38,68 faizi bir illik qiymətli kağızlarda, 32,24 faizi bir ildən üç ilədək, 25,73 faizi - üç ildən beş ilədək, 3,26 faizi - beş ildən yuxarı, habelə 0,08 faizi səhmlərdə yerləşdirilib.
İyunun 30-na olan məlumata görə, Fondun aktivlərinin 39,77 faizi "ААА" reytinqli, 20,9 faizi "АА", 32,51 faizi - "А", 6,81 faizi - "ВВВ", 0,01 faizi isə digər qiymətli kağızlarda yerləşdirilib. Fondun aktivləri investisiya reytinqindən aşağı aktivlərdə yerləşdirilə bilməz.
ARDNF-in aktivləri qismən qiymətli kağızlarda, pul bazarı alətlərində (depozitlər, bank hesabları) yerləşdirilib. Hazırda Fondun aktivlərinin 26,39 faizi agentlik və beynəlxalq təşkilatlarının istiqrazlarına, 17,38 faizi suveren borc kağızlarına, 17,26 faizi maliyyə istiqrazlarına, 20 faizi korporativ istiqrazlara, 11,45 faizi qısamüddətli kommersiya kağızlarına, 4,89 faizi zəmanətli istiqrazlara, 0,09 faizi bələdiyyə istiqrazlarına, 2,46 faizi depozitlərə və pul bazarı alətlərinə qoyulub.
Fondun aktivlərinin yerləşdirilmə coğrafiyası aşağıdakı kimidir: 67,11 faizi Avropa ölkələrində, 13,99 faizi Şimali Amerikada, 6,11 faizi beynəlxalq maliyyə təşkilatlarında, 4,46 faizi Asiyada, 7,6 faizi inkişaf edən ölkələrdə və 0,73 faizi Yaxın Şərqdə.