Azərbaycan, Bakı, 15 oktyabr /Trend, müxbir E.İsmayılov/
Yanvar-sentyabrda ARDNŞ (Azərbaycan Respublikası Dövlət Neft Şirkəti) Azərbaycan əhalisinə 1,33 milyard kubmetrə yaxın təbii qaz verib. Ötən ilin analoji dövründə bu göstərici təqribən 1,29 milyard kubmetr qaz təşkil edib. Trend-in məlumatına görə, bu barədə ARDNŞ-nin şənbə günü yaydığı məlumatda deyilir.
Bu ilin sentyabrında əhaliyə 61,5 milyon kubmetr "mavi yanacaq" verilib. Halbuki 2010-cu ilin eyni ayında bu rəqəm 62,5 milyon kubmetr olub.
ARDNŞ 2010-cu il ərzində isə Azərbayvan əhalisinə ümumilikdə təqribən 1,7 milyard kubmetr təbii qaz ötürüb.
Şirkətin sənaye müəssisələrinə yanvar-sentyabr aylarında 814,2 milyon kubmetr qaz verilib. Ötən ilin eyni dövründə isə verilən qazın həcmi 670,1 milyon kubmetr olub.
2010-cu ildə şirkətin sənaye müəssisələrinə ümumilikdə 956,7 milyon kubmetr qaz verilib.
Yanvar-sentyabrda kommunal büdcə müəssisələrinə ötürülən "mavi yanacağ"ın həcmi 153,5 milyon kubmetr təşkil edib. Bu rəqəm 2010-cu ilin eyni dövrü ilə müqayəsədə 160,6 milyon kubmetr olub.
2010-cu ildə ARDNŞ kommunal büdcə müəssisələrinə ümumilikdə 208,2 milyon kubmetr qaz ötürüb.
Bundan başqa, ARDNŞ cari ilin yanvar-sentyabrında "Naxçıvanqaz" İstehsalat Birliyinə 217,7 milyon kubmetr qaz verib.
Əvvəllər ölkə daxilində təbii qaz əməliyyatlarını "Azəriqaz" QSC həyata keçirib. 2009-cu ilin iyun ayında "Azəriqaz" QSC İstehsalat Birliyi qismində ARDNŞ-nin tərkibinə daxil edilib.
