Azərbaycan, Bakı, 17 oktyabr /Trend, müxbir İ.Xəlilova/
İslam İnkişaf Bankı (İİB) Mingəçevir Su Elektrik Stansiyasının II fazasının yenidən qurulması və 800 meqavat gücə malik Cənub stansiyasının (Əli-Bayramlı İstilik Elektrik Stansiyasının yaxınlığı) tikintisi ilə bağlı enerji layihələrinin həyata keçirilməsini qiymətləndirmək üçün Azərbaycana missiya göndərir. Bunu bazar ertəsi Trend-ə bankın Bakı ofisindəki mənbə deyib.
Başda bankın mütəxəssisi Məhəmməd Al Səid olmaqla, İİB-in missiyası Bakıya oktyabrın 23-də gələcək.
"Bu səfər işgüzar xarakter daşıyır. Belə ki, missiya bankın maliyyələşdirdiyi enerji layihələrinin həyata keçirilməsindəki irəliləyişlərlə tanış olmaq niyyətindədir", - mənbə bildirib.
Missiya, həmçinin Balaxanı qəsəbəsindəki Bərk Məişət Tullantılarının Yandırılması Zavodunun tikinti prosesi ilə tanış olmaq niyyətindədir. Xüsusilə də bu layihənin enerji tərkibli məsələlərini öyrənmək istəyir. Məişət tullantılarının yandırılması nəticəsində ildə 231,5 milyon kilovat-saat elektrik enerjisi istehsal olunacaq və şəhər şəbəkəsinə istiqamətləndiriləcək.
Ümumi dəyəri 346 milyon avro olan layihənin həyata keçirilməsı üçün İİB 150 milyon avro ayırıb. Bu vəsait zibil yandırma zavodunun tikintisi üçün avadanlıqların alınmasına xərclənəcək. İllik gücü 500 min ton olan Bərk Məişət Tullantıları Zavodunun 2012-ci ilin sonuna qədər istifadəyə verilməsi gözlənilir.
Ümumi dəyəri 105 milyon dollar olan Mingəçevir SES-in yenidən bərpa edilməsi layihəsi üzrə hazırda tikinti işləri aparılır. İİB Direktorlar Şurası hələ 2007-ci ilin yanvarında bu layihənin maliyyələşdirilməsi üçün 80 milyon dollar kreditin ayırılmasını təsdiqləyib. Layihənin əlavə xərcləri (25 milyon dollar) Azərbaycan hökumətinin payına düşür. İİB-in layihəyə ayıracağı kredit güzəştli müddətlə 15 ilə verilir. Belə ki, kredit 3 ilə və 5,95 faiz dərəcəsi ilə ayrılır.
"Bankın missiyası SES-in yenidən qurulması işlərinin başa çatması müddətini müzakirə etməyi planlaşdırır", - hökumətdən bildiriblər.
