Azərbaycan, Bakı, 5 fevral /Trend, müxbir E.İsmayılov/
Azərbaycan qazının Avropaya ixracı marşrutu qismində Trans-Adriatik boru kəməri (TAP) layihəsinin seçilməsi Azərbaycanın təbii sərvətlərinin düşünülmüş istifadəsinə, enerji təhlükəsizliyinin möhkəmləndirilməsinə zəmin yaratmaqla bərabər, investisiyaların artımına da səbəb olacaq. Trend-in məlumatına görə, bu barədə energetika naziri Natiq Əliyevin "Azərbaycan" qəzetində dərc edilən məqaləsində deyilir.
"Cənub Qaz Dəhlizi" Avropaya karbohidrogen tədarükləri mənbələrini şaxələndirməyə, enerji təhlükəsizliyini artırmağa, Azərbaycana isə Avropanın simasında yeni bazar əldə etməyə imkan verəcək layihədir.
Nazir qeyd edib ki, TAP layihəsinin tikintisi ən ucuz başa gələn qısa marşrut olduğundan "Cənub Qaz Dəhlizi"nin mümkün qədər tez bir zamanda istismara verilməsi Azərbaycanın Avropanın enerji təhlükəsizliyinin etibarlı təminatçısına çevrilməsi istiqamətində yeni bir mərhələdir.
Məqalədə deyilir ki, "Cənub Qaz Dəhlizi"nin fəaliyyətə başlaması nəticəsində ölkəmizin neft-qaz sənayesində də mühüm nailiyyətlərin əldə edilməsi gözlənilir. Nailiyyətlər arasında Azərbaycanın Xəzər sektorunda yataqlar və perspektiv strukturların işlənməsi var.
Qeyd edək ki, TAP səhmdarları aşağıdakı şirkətlərdir: ARDNŞ (20%), BP (20%), Statoyl (20%), Fluxys (16%), Total (10%), E.ON (9%) və Axpo (5%).
