Azərbaycan, Bakı, 1 aprel /Trend, müxbir E.İsmayılov/
Xəzərin Azərbaycan sektorundakı "Şahdəniz" qaz-kondensat yatağının işlənməsinin ikinci mərhələsi çərçivəsində Səngəçal terminalının genişləndirilməsi üzrə tammiqyaslı işlərə gələn aydan başlanacaq. Bu barədə çərşənbə axşamı Trend-ə ölkənin neft-qaz bazarındakı mənbə bildirib.
Agentliyin müsahibinin sözlərinə görə, hazırda "Tekfen-Azfen" şirkəti terminalda hazırlıq işləri aparır, eləcə də metal konstruksiyaların istehsalı məqsədi ilə sexlərin tikintisi üçün meydanın hazırlanmasını həyata keçirir.
Mənbə bildirib: "Terminalın genişləndirilməsi üzrə işlərə tammiqyaslı hazırlıq gedir. Hazırlıq işləri bilavasitə həm terminalın özündə, həm də metal konstruksiyaların istehsalı məqsədi ilə sexlərin yaradılması çərçivəsində aparılır. Bunların hamısı artıq bu ilin mayında işlərə başlamağa imkan verir".
Bir müddət əvvəl "Şahdəniz"in işlənməsi layihəsinin operatoru olan BP şirkəti "Şahdəniz-2" layihəsi çərçivəsində ATA konsorsiumu ilə ümumi məbləği 974 milyon dollar olan müqavilə imzaladığını elan edib.
Müqavilə çərçivəsində Səngəçal terminalında qaz və kondensat emalı qurğusunun, qaz, kondensat və monoetilenqlikolun nəqli üçün sualtı boru kəmərinin sahilə çıxdığı yerdən terminaldakı qurğuyadək quru ilə uzanan boru kəmərinin tikintisi işləri nəzərdə tutulur. İşlərin 2018-ci ildə başa çatdırılması planlaşdırılır.