Enerji sisteminin sinxronlaşdırılması məsələləri üzrə Soçidə Azərbaycan-Rusiya-İran görüşü keçirilib. Bu barədə Trend ə Azərenerji SC-nin mətbuat xidmətində bildirilib. Azərenerji SC-nin Azərbaycan energetiklərinin nümayəndə heyətinə başçılıq etmiş baş mühəndisi Saleh Məmmədovun sözlərinə görə, görüşdə "EES Rossii" RSC və İranın "Tavanir" şirkətlərinin səlahiyyətli nümayəndələri iştirak edib.
2004-cü il oktyabrın 26-da Tehranda Azərbaycan, Rusiya və İran arasında üç ölkənin enerji şəbəkələrinin sinxronlaşdırılmasına dair saziş layihəsi imzalanıb. "Saziş əsasında 2005-ci ildə böyük həcmdə işlər görülüb və bunların nəticələri layihəyə cəlb olunmuş hər üç ölkənin nümayəndələri tərəfindən Soçidə müzakirə edilib" -deyə S.Məmmədov bildirib. Ekspertlərin araşdırmaları göstərir ki, layihə realdır və mövcudiyyət hüququ vardır.
2006-cı ilin yanvarınadək layihənin TİƏ üzərində işlərin davam etdirilməsi qərara alınıb. Buna müvafiq olaraq yaxın illərdə iki sistemlərarası EÖX - Dərbənd (RF)-Yaşma (AR) və İmişli (AR) - Parsabad (İİR) çəkilməsi nəzərdə tutulur.Bu EÖX Azərbaycan-Rusiya və Azərbaycan-İran enerji axınlarını ilkin mərhələdə 500 MVt-dək (2007-2008-ci illər) və perspektivdə 1000 MVT-dək artırmağa imkan verəcək.