Azərbaycan hökumətindən Trend agentliyinə verilən məlumata görə, Bakı-Tbilisi-Ceyhan boru kəməri ilə neftin birgə nəqli haqqında Azərbaycan-Qazaxıstan hökumətlərarası sazişi iyunda imzalana bilər. Bu tarixdə ixrac boru kəmərinin istifadəyə verilməsi ilə bağlı rəsmi mərasimin keçirilməsi planlaşdırılır.
Sazişin hazırlanması üzrə Azərbaycan-Qazaxıstan danışıqları aprelin sonunda Bakıda nəzardə tutulub. Qazaxıstan nümayəndə heyətinə gözlənilən danışıqlarda energetika və təbii sərvətlər naziri Baktıkoja İzmuxambetov rəhbərlik edəcək. "Kazmunayqaz" SC-nın vitse-prezidenti Kairgeldı Kabıldin artıq aprelin əvvəlində Bakıda olub. Ekspert qrupları sazişlə bağlı bir sıra məsələləri müzakirə ediblər.
Gözlənilən danışaqlar zamanı hökumətlərarası sazişə dəyişiklik və əlavələrin edilməsi, eləcə də dəyişikliklər təsdiqləndikdə sazişin dəqiq imzalanma tarixinin müəyyənləşdirilməsi planlaşdırılır.
Saziş xüsusilə Xəzərin Qazaxıstan sektorunda işləyən 4 BTC layihəsi iştirakçıları üçün vacibdir. Həmin saziş çərçivəsində 2010-cu ildən sonra gündə 500 min barel neftin nəqli gözlənilir. Qazaxıstan ərazisində Kırık kəndinə qədər boru çəkmək, terminal tikmək və neft donanması təşkil etmək də nəzərdə tutulub.
