10 gün ərzində neft Türkiyə ərazisindəki 4-cü nasos stansiyasına çatacaq və yoxlanıldıqdan sonra Ceyhan lmnanına göndəriləcək. Trend agentliyinin BP Azerbaijan şirkətinin prezidenti Devid Vudvorda istinadən yaydığı məlumata əsasən, birinci tanker Ceyhan limanından 2006-cı il yazın sonunda göndəriləcək.
D.Vudvordun dediklərinə görə, bu il BTC vasitəsilə orta hesabla gündə 300 min barel neft nəql olunacaq, lakin ilin sonunda bu göstərici artacaq.
Hazırda Türkiyənin Botaş şirkəti ilə maliyyə iddiaları ilə bağlı danışıqlar davam edir. Eyni zamanda BTC layihəsinin iştirakçıları olan Qazaxıstan yükdaşıyanları ilə danışıqlar gedir. Bu şirkətlərlə neftin çatdırılma müddəti və həcmi müzakirə olunur. Lakin Vudvordun dediklərinə görə, hazırda BP Qazaxıstanda neft hasilatı ilə məşğul olan şirkətlərlə razılığa gəlməyə çalışır. Əgər bu məsələ ilə bağlı razılıq əldə olunarsa, artıq 2007-ci ildən neft BTC kəməri vasitəsilə nəql oluna bilər.
Amma bu həmçinin neftin keyfiyyətindən də asılı olacaq. BTC keyfiyyət standartlarına uyğun olmayan neft kəmərə vurulmayacaq. Artıq neftin keyfiyyət bankı yaradılıb və layihədə iştirak edən şirkətlərə tətbiq olunacaq.
