Planlaşdırılmış on günlük dayanmadan sonra BP Azərbaycan quyularda yan lülələrin qazılması proqramını davam etdirəcək, bundan sonra isə dekabr ayında A-21 quyusunu qazmağa başlayacaq. Trend xəbər verir ki, A-21 platformadan uzaq məsafəyə qazılacaq suvurma quyusu olacaq.
"Mərkəzi Azəri"də şirkət iyulun sonunda platformadan qazılmış ikinci quyunu (bu, hasilat quyusudur) tamamlayıb və hazırda üçüncü quyunu qazır. Noyabrın ortasınadək bu quyu layihə dərinliyinə çatdırılacaq. Bu il MA platformasından daha iki quyu qazmağı planlaşdırılıb ki, onların hamısı hasilat quyusu olacaq.
"Qərbi Azəri"də şirkət öncədən qazılmış bütün dörd quyunun hamısının platformaya birləşdirilməsi apreldə tamamlayıb, platformadan iki quyu qazıb və bu ayın əvvəlində platformadan hasilat quyusu olan üçüncü quyunu qazmağa başlayıb. Tamamlanması dekabrın ortasına planlaşdırılmış bu quyunun layihə dərinliyi 4055 metrdir. Ondan sonra bu il platformadan qazılan dördüncü quyu kimi bir vurucu quyunun qazılmasına başlamaq planlaşdırılıb. .
"Dərinsulu Günəşli"də Faza 3 çərçivəsində öncə qazma proqramı "Dədə Qorqud" yarımdalma qazma qurğusunun təmirinin avqustda başa çatmasından sonra uğurla davam edir. Qazma qurğusunun təmir və modernləşdirmə proqramının uğurla başa çatmasından sonra o, dayaq tavasından öncə qazma işlərinə yenidən başlamaq üçün qazma, texnoloji təchizat və yaşayış platformasının yerinə qayıdıb. O zamandan bəri qazma qurğusu DSG platformasının yerində bir öncə qazma quyusu qazıb, birininin qazılmasını saxlayıb və hal-hazırda üçüncü öncə qazma hasilat quyusu kimi layihələşdirilmiş quyusunu qazmaqdadır.
DSG öncə qazma proqramı hazırda səkkiz quyudan ibarətdir, onlardan yeddisi lay tavanına qədər qazılmış hasilat quyusu, biri isə şlamların yenidən laya vurulması quyusu kimi (yalnız platformadan qazma əməliyyatlarında istifadə etmək üçün) planlaşdırılır. Dayaq tavasından qazılmış öncə qazma quyularından əlavə, DSG qazma əməliyyatlarına həmçinin altı ədəd sualtı suvurma quyusu daxildir ki, bunlar da "Dədə Qorqud" qazma qurğusu ilə qazılacaq.