Gələn il Bakı-Tbilisi-Ceyhan boru kəməri üzrə "Azəri"-"Çıraq"-"Günəşli" yataqlarından orta hesabla 500 min barel neft nəql olunacaq. Daha 50 min barel "Şahdəniz" yatağındakı kondensat hesabına nəql oluna bilər. Trend xəbər verir ki, bu barədə BP şirkətinin prezidenti Deyvid Vudvord məlumat verib.
Onun sözlərinə görə, əgər boru kəmərinə ChevronTexaco şirkətinin nefti nəql olunsa, o zaman nəql həcmi sutkada 100 min barelə qədər arta bilər. Bundan başqa, boru kəməri üzrə digər yataqlarda hasil olunan Azərbaycan nefti nəql oluna bilər.
Gələn il boru kəməri sutkada 1 mln. barel neft həcmində layihə gücünə çatacaq. Nəqlin bu səviyyəsində sutkada 1-2 tanker Ceyhanda doldurulacaq. Hazırda bu mümkün deyil, belə ki, nasos stansiyalarında yanacaq kimi istifadə olunan qaz "Şahdəniz" yatağından tədarük olunmalıdır. Bu, bir neçə aydan sonra baş verəcək.
Hazırda boru kəməri üzrə ən yüksək nəql həcmi 520 min bareldən artıqdır. Bu göstərici sentyabr ayında əldə olunub. Bu ilin ilk üç rübü ərzində boru kəmərinin doldurulması və maliyyələşdirilməsi üçün neftin qiyməti də daxil olmaqla, BTC-nin kapital xərcləri 834 mln. ABŞ dolları təşkil edib. Bizim proqnozlarımıza görə, bu il BTC-də ümumi kapital xərcləri 932 mln. ABŞ dolları təşkil edəcək.
