Azərbaycan, Bakı/ Trend / Azərbaycan Dövlət Neft Şirkəti (ADNŞ) müstəqil surətdə işlədiyi "Günəşli" yatağının azsulu hissəsində yeni yüksəkdebitli quyunun istismarına başlayıb. Çərşənbə axşamı ADNŞ-dən verilən məlumatda quyunun "Günəşli- 19" platformasında qazıldığı göstərilib.
Quyunun dərinliyi 3 350 metrdir. Yüksək təzyiqli yeni qaz kəmərinə qoşulmuş quyunun debiti 500 min kubmetr qaz və 30 ton kondensatdır. Bu "Günəşli" yatağında "Bayıl limanı" dəniz kəşfiyyat qazma işləri idarəsi tərəfindən qazılmış üçüncü quyudur. Üç quyunun sutkalıq debiti 1 mln. kubmetr qaz təşkil edir.
Hazırda "Günəşli" yatağında ADNŞ-in "28 may" neft-qaz çıxarma idarəsinin sutkalıq debiti ötən ildəki 6 mln. kubmetr qaza qarşılıq 10,8 mln. kubmetr qaz təşkil edir.
ADNŞ-in öz qaz hasilatını artırmaq barədə proqramına uyğun olaraq, iki il müddətində hər birinin sutkalıq debiti 250-300 min kubmetr, ümumilikdə isə 7 mln. kubetr qaz olan 23 quyu qazılacaq.
