Azərbaycan, Bakı/ Trend / Qazaxıstan neftinin Bakı-Tbilisi-Ceyhan boru kəməri ilə ixracı üçün neft nəqli obyektlərinin tikintisi üzrə birgə müəssisə (BM) yaradılacaq. BM-in yaradılması üçün Azərbaycan Dövlət Neft Şirkəti və "KazMunayQaz" MŞ SC razılaşma imzalayıbar. Bu barədə ARDNŞ prezidenti Rövnəq Abdullayev Qazaxıstanda məlumat verib.
Onun sözlərinə görə, "bu o deməkdir ki, hər şey tərəfdaşlıq əsasında tikiləcək". Abdullayev bildirib ki, obyektlərin siyahısına Kurıkda liman, tankerlər, nəql sistemi, Bakıda terminallar və onların BTC-yə qoşulması daxildir.
Azərbaycan prezidenti İlham Əliyevin hazırda Qazaxıstana davam edən səfəri zamanı ARDNŞ və "KazMunayQaz" arasında Memorandum imzalanıb. İmzalanmış Memoranduma əsasən, tərəflər Xəzər dənizinin Qazaxıstan və Azərbaycan sahillərində neft terminallarının, tanker və gəmilərin, Bakı-Tbilisi-Ceyhan sisteminə quşulma qurğularının daxil olduğu Transxəzər layihəsini birgə həyata keçirmək niyyətindədirlər.
Transxəzər sistemi Qazaxıstan tərəfindən planlaşdırılan Qazaxıstan Xəzər Nəql Sisteminin (QXNS) bir hissəsidir. QXNS ilkin mərhələdə sutkada 500 min barel (ildə 23 mln. ton), gələcəkdə isə sutkada 750-1200 min barel (ildə 35-56 mln. ton) neft nəqlini təmin edəcək.