Azərbaycan, Bakı/ Trend , müxbir V.Şərifov/ "Gobustan Operating Company" (GOC) Azərbaycan Dövlət Neft Şirkətinə sutkada qurudakı "Cənub-qərbi Qobustan" yatağından hasil olunan 40 min ton sərbəst qaz tədarük edir. Bu barədə şənbə günü layihəyə yaxın mənbə məlumat verib.
GOC ARDNŞ-ə qazı $1.33/1 mln. BTU qiymətinə satır ($1.33/1 mln. BTU - təqribən $47,4/1 min kubmetr). "Gobustan Operating Company"də 80% iştirak payı "Commonwealth Gobustan Limited" şirkətinə, 20% iştirak payı isə ARDNŞ-ə məxsusdur. "Commonwealth Gobustan Limited" şirkətinin 37,17 faizi "Arawak Energy" şirkətinə, 62,83 faizi isə "China National Petroleum" şirkətinə məxsusdur.
Mənbə qeyd edib ki, qaz müxtəlif vaxtlarda yataqda qazılmış üç quyuda hasil edilir. Bu il qazın daha iki quyudan çıxarılacağı da istisna edilmir.
ARDNŞ həmçinin "Anshad Petrol" birgə müəssisəsindən (BM) sərbəst qaz alır. 2007-ci ilin yanvar-iyun aylarında iki şirkət ARDNŞ-ə 14,73 mln. kubmetr sərbəst qaz tədarük edib ki, bu da 2006-cı ilin müvafiq dövrü ilə müqayisədə 0,29 mln. kubmetr çoxdur. İyul ayında şirkətlər tərəfindən 1,28 mln. kubmetr qaz satılıb.
BM sərbəst qaz satışına 2004-cü ilin may ayından 2 mln. kubmetr qaz satılması ilə başlayıb.
"Anshad Petrol" "Neftçala", "Xillı" və "Babazənən" yatqlarında qaz hasil edir.
"Anshad Petrol" BM 1993-cü ildə "Neftçalaneft" NQÇİ əsasında ARDNŞ və Türkiyənin "Atilla Dogan Petrol" şirkəti əsasında yaradılıb. 1994-1996-cı illərdə "Anshad Petrol" BM-in operatoru "Atilla Dogan Petrol" olub, 1997-ci ildən ARDNŞ bu funksiyanı öz üzərinə götürüb. 1995-ci ildə Malayziyanın "Land and General Berhad" şirkəti 17,15% payı "Atilla Dogan Petrol"dan almaqla layihənin iştirakçısı olub.
