Bakı. Trend:
Azərbaycan həm quruda, həm də dənizdə külək enerjisinin inkişafı üçün böyük potensiala malikdir və zəngin külək resursları, eləcə də küləyin sabit sürəti sayəsində təcrübəli külək parkı developerləri üçün cəlbedici ölkədir. Öz “yaşıl” energetikasını inkişaf etdirməklə Azərbaycan qonşu ölkələrə də karbon emissiyalarını azaltmaqda kömək göstərə bilər, məsələn, onların müəssisələrinin ənənəvi yanacaq əvəzinə elektrik enerjisindən istifadəyə keçidi hesabına.
Bu barədə Trend-ə Avropa külək enerjisi sənayesi assosiasiyası "WindEurope"un sənaye məsələləri üzrə direktoru Fil Koul bildirib.
“Bundan əlavə, Azərbaycan əlverişli mövqedədir, çünki o, əvvəlki illərdə daha yetkin külək enerjisi bazarlarında yol verilmiş səhvləri nəzərə alaraq onlardan yayınmaq imkanına malikdir. Bu da ölkəyə öz böyük külək resurslarını daha sürətli və səmərəli şəkildə inkişaf etdirməyə şərait yaradır. Azərbaycan eyni zamanda qonşu ölkələrdə külək enerjisinə marağı stimullaşdıra və regionda bu texnologiyaların inkişafında liderə çevrilə bilər. "WindEurope"un Xəzər regionunda külək enerjisinin inkişafına dəstək üzrə strateji prioritetləri zəngin külək və digər bərpa olunan enerji mənbələri potensialından istifadə etməyə, eləcə də iqtisadi, texnoloji və ekoloji üstünlüklərin təşviqinə yönəlib”, – deyə o bildirib.
Koul qeyd edib ki, Azərbaycanın hökuməti və sənayesi qarşısında quruda və dənizdə külək enerjisinin inkişafı üçün bir sıra vəzifələr dayanır. Əsas tapşırıqlardan biri layihələrin təkcə dəyərini deyil, həm də keyfiyyətini nəzərə alan səmərəli hərrac sisteminin yaradılmasıdır. Həmçinin dənizdə obyektlərin yerləşdirilməsi planının, elektrik şəbəkələrinin inkişaf strategiyasının hazırlanması və külək elektrik stansiyalarının tikintisi üçün icazə prosedurlarının sadələşdirilməsi zəruridir.
Külək elektrik stansiyalarında istehsal olunan enerjinin Avropa alıcılarına tədarükünə toxunan Koul bunun Xəzər–Avropa “yaşıl” enerji dəhlizi, Qara dənizin dibi ilə çəkiləcək sualtı kabel vasitəsilə mümkün ola biləcəyini qeyd edib.
“2024-cü ilin martında "WindEurope" ilə Azərbaycan Bərpa Olunan Enerji Mənbələri Agentliyi arasında anlaşma memorandumunun imzalanmasından sonra biz Azərbaycanın külək enerjisi potensialının genişləndirilməsinə ən yaxşı təcrübələrin mübadiləsi və mümkün risklərin təhlili, quruda və dənizdə külək enerjisinin inkişafı üzrə məsləhətlər, həmçinin Avropa elektrik enerjisi alqı-satqısı müqavilələri bazarının təcrübəsinin ötürülməsi yolu ilə dəstək verəcəyik. Məhz bu bazar gələcəkdə sistemlərarası enerji dəhlizinin əsasını təşkil edəcək. Beləliklə, bizim dəstəyimiz əsasən tənzimləyici və məsləhət xarakteri daşıyacaq”, – deyə Koul əlavə edib.
Onun sözlərinə görə, "WindEurope" bu layihənin irəlilədilməsi məqsədilə Azərbaycan və Aİ-də siyasətçilər, tənzimləyici qurumlar və potensial elektrik enerjisi alıcıları arasında əlaqələrin qurulmasına dəstəyi davam etdirəcək.