Bakı. Trend:
Azərbaycan Memarlıq və İnşaat Universitetinin (AzMİU) 2026-cı il üzrə “QS Subject Rankings” reytinqində “İncəsənət və Dizayn” sahəsi üzrə dünyanın ən yaxşı universitetləri sırasında yer alması universitetin bu istiqamətdə uzun illər ərzində formalaşdırdığı elmi-pedaqoji potensialın və strateji inkişaf xəttinin mühüm nəticəsidir.
AzMİU bu nüfuzlu beynəlxalq reytinqdə dizayn sahəsi üzrə Azərbaycandan yer alan yeganə ali təhsil müəssisəsi olmaqla yanaşı, ölkədə bu istiqamət üzrə lider mövqeyini bir daha təsdiqləyib. Universitetin 201–250 aralığında qərarlaşması onu dünya üzrə ən yaxşı 250 universitet sırasına daxil edir ki, bu da əldə olunan nəticənin yüksək göstəricisidir.
Qeyd etmək lazımdır ki, AzMİU-da dizayn təhsili sistemli və məqsədyönlü şəkildə inkişaf etdirilib. Hələ 1994-cü ildən etibarən bu sahədə elmi-pedaqoji kadr potensialı formalaşdırılmış, 1998-ci ildən isə dizayn ixtisası üzrə peşəkar kadr hazırlığına başlanılmışdır. Bu illər ərzində yaradılan akademik baza və tətbiq olunan müasir tədris yanaşmaları ölkədə dizayn təhsilinin inkişafında mühüm rol oynayıb.
2024-cü ildən etibarən universitetdə müstəqil Dizayn fakültəsinin yaradılması ilə bu istiqamət yeni inkişaf mərhələsinə qədəm qoyub. Fakültədə beynəlxalq standartlara uyğun, praktik və innovativ yanaşmalara əsaslanan tədris prosesi təşkil olunur, tələbələrin yaradıcılıq potensialının inkişafına xüsusi diqqət yetirilir.
AzMİU-nun dizayn sahəsində beynəlxalq əməkdaşlıq imkanları da genişdir. Universitet Avropanın aparıcı ali təhsil müəssisələri ilə ikili diplom proqramları həyata keçirir, tələbələrə beynəlxalq akademik mühitdə təhsil almaq və təcrübə qazanmaq imkanı yaradır.
Bununla yanaşı, universitetdə fəaliyyət göstərən İtaliya–Azərbaycan Dizayn Mərkəzi bu sahədə xüsusi əhəmiyyətə malikdir. Mərkəz İtaliyanın qabaqcıl dizayn təcrübəsinin öyrənilməsi və tədris prosesinə inteqrasiyası baxımından mühüm platforma rolunu oynayır.
Biz hesab edirik ki, əldə olunan bu nəticə təkcə bir reytinq göstəricisi deyil, həm də universitetin dizayn sahəsində ölkədə formalaşdırdığı lider mövqeyin beynəlxalq səviyyədə tanınmasının bariz göstəricisidir. Universitet bundan sonra da dizayn təhsilinin inkişafı, yaradıcı sənayelərlə inteqrasiyanın gücləndirilməsi və beynəlxalq əməkdaşlığın genişləndirilməsi istiqamətində fəaliyyətini davam etdirəcək.
Nicat Abdullayev
AzMİU-nun ictimaiyyətlə əlaqələr şöbəsinin
müdiri