Azərbaycan, Bakı, 16 fevral / Trend / 2008-ci ilin yanvar ayında Azərbaycanda təşkilatlara və əhaliyə 56,1 mln. manat dəyərində rabitə xidməti göstərilib. Bu rəqəm 2007-ci ilin eyni dövr göstəricisi ilə müqyisədə 40,3 faiz çoxdur. Bu barədə Azərbaycan Dövlət Statistika Komitəsindən məlumat verilib.
Əldə olunan gəlirlərin 72 faizdən çoxu mobil rabitə xidmətinin payına düşüb. Yanvar ayı üzrə bu sahədə artım 61,6 faiz təşkil edib.
Azərbaycan regionlarında da göstərilən rabitə xidmətlərinin həcmi artıb. Quba-Xaçmaz iqtisadi rayonunda xidmət artımı 21,8 faiz, Şirvanda 42,8 faiz, Şəki-Zaqatalada 37,3 faiz, Aranda 30,6 faiz, Naxçıvanda 29 faiz, Lənkaranda 44,2 faiz, Abşeronda 32,3 faiz və Gəncə-Qazaxda 20,2 faiz təşkil edib.
2007-ci ildə 295,9 manat orta aylıq əmək haqqı ilə rabitə sahəsində çalışan işçilərin sayı 21,9 min nəfər təşkil edib. Bu, ötən ilin analoji dövr göstəricisi ilə müqayisədə 34,1 faiz çoxdur. Dövlət müəssisələri üzrə əmək haqqı artımı 19,5 faiz, özəl sektor üzrə isə 34,8 faiz təşkil edib.