Azərbaycan, Bakı, 29 may / Trend , müxbir M.Əliyev, S.Babayeva/ Azərbaycan və Ukrayna kosmik sahədə əməkdaşlıq edə bilər. Bu haqda Ukraynanın Azərbaycandakı səfiri Boris Klimçuk cümə axşamı mətbuat konfransında bildirib.
"Bunun üçün bizim [Ukraynanın] raket-daşıyıcısı, Azərbaycanın isə şəxsi rabitə peykini buraxmaq planları var", - deyə səfir bildirib. Hazırda təxminən 30 ölkənin şəxsi peyki var.
Səfirin sözlərinə görə, Azərbaycanın şəxsi rabitə peyki olmadığından, xarici ölkələrin xidmətlərindən yararlanır və bu xidmətlərə görə pul ödəyir.
Klimçuk hesab edir ki, Azərbaycanın şəxsi peyki rabitə və tele-radioyayımın səviyyəsini və etibarlığını artırmağa imkan yaradacaq.
Beynəlxalq Elektrik Rabitə İttifaqının ("İTU") baş katibi Hamadun Turenin əvvəllər dediyi kimi, Azərbaycan peyki üçün orbital mövqe ilin sonunadək ayrılacaq.
Azərbaycan Rabitə və İnformasiya Texnologiyaları Nazirliyində qeyd edirlər ki, layihənin ilkin mərhələdə maliyələşdirilməsi dövlət vəsaiti hesabına mümkün olacaq. Sonra o, öz özünü maliyyələşdirəcək. Peykin 25-30 faiz vəsaitinin Azərbaycan tərəfindən istifadə olunması, qalanının isə, peykin əhatə zonasına daxil olan ölkələrə satılması planlaşdırılır. "AzerSat" layihəsi $80-100 mln. dəyərləndirilir. Peyk hazırlandıqdan sonra Baykanurdan (Qazaxıstan) orbitə buraxılacaq.
Peykin əhatə zonasına Avropa və Asiyanın bir hissəsi - Qazaxıstan, Türkmənistan, İranın daxil olacağı proqnozlaşdırılır. Dövlət idarəsində hesab edirlər ki, peyk 2010-cu ildə orbitə buraxıla bilər. "AzerSat"-ın istismar müddəti - 20 ildir.