Azərbaycan, Bakı, 06 iyun / Trend , müxbir S.Babayeva/ 2008/2009-cu təhsil illərindən Azərbaycan Texniki Universitetində "Kompüter elmləri" (Computer Science) üzrə magistrların təhsil alması mümkün olacaq. Ali təhsil müəssisəsindən verilən məlumata görə, təhsil Azərbaycan Rabitə və İnformasiyaTexnologiyaları Nazirliyinin yardımı ilə, beynəlxalq maarifəyardım proqramı çərçivəsində, Höteburq İT Universiteti ilə birgə həyata keçiriləcək.
"Kompüter elmləri" ixtisasına kompüter mühəndisliyi, informasiya mühəndisliyi, kompüter təhlükəsizliyi, avtomatlaşdırılmış sistem və hesablayıcı texnikanın proqram təminatı, informatika, menecment, biznesin təşkili və idarə olunması, biznes- administrasiya, informasiya texnologiyaları və s. daxildir.
Təhsil ödənişli əsaslarla hər iki universitetin müəllimləri tərəfindən ingilis dilində aparılacaq.
Magistrların qəbulu Azərbaycanın Tələbə Qəbulu üzrə Dövlət Komissiyasının qaydaları əsasında təsis edilb.
Təxminən 50 min tələbənin təhsil aldığı Höteburq Universiteti (isveç. Göteborgs universitet, lat. Universitas Regia Gothoburgensis) Skandinaviyanın böyük və Avropanın isə əsas universitetlərindən biridir.
Universitet 1891-ci ildə Göteborgs högskola kimi (Höteburnali məktəbi) təsis edilib və vaxtilə şəhərin bütün ali təhsil müəssisələrini özündə birləşdirib. O, 1954-cü ildə Höteburq tibb məktəbi (İsveç. Medicinhögskolan i Göteborg) ilə birləşdirildikdən sonra, mükəmməl universitetə çevrilib.
Universitet "Sahlgrenska" Tibb Akademiyası, "Valand" təsviri incəsənət, biznes, iqtisadiyyat və hüquq məktəblərini, ictimai elmlər, incəsənət pedaqoji, fakultələrini, elmi fakultəni və Höteburq İT Universitetini birləşdirir.
