Azərbaycan, Bakı, 06 avqust / Trend , müxbir S.Babayeva/ "Azerpocht" Dövlət Müəssisəsi (DM) 2011- ci ildən gəlirlə işləyən müəssisəyə çevrilə bilər. Bu barədə Nazirlər Kabinetinin prezident İlham Əliyevin sədrliyi ilə keçən və 2008 - ci ilin birinci yarısının sosial-iqtisadi inkişafının yekunlarına həsr olunmuş iclasında ölkənin rabitə və informasiya texnologiyaları naziri Əli Abbasov bildirib.
Onun sözlərinə görə, bu, yaxın iki ildə subsidiyaların artırılması sayəsində mümkün ola bilər.
"Bu məsələ ilə əlaqədar olaraq Maliyyə və İqtisadi İnkişaf nazirlikləri ilə müzakirələr aparılır", - deyə nazir bildirib.
Dövlət başçısının sərəncamına əsasən, cari ilin birinci yarısında gəlirləri 30 faiz artan "Azerpocht" DM üçün artıq iki ildir ki, dövlət sərmayələri hesabına 2-3 mln. manat ayrılır.
Bundan əlavə, Dünya Bankı ilə birgə reallaşdırılan "Maliyyə xidmətlərinin inkişafı" layihəsi çərçivəsində, "Azerpocht" 2009-cu ilin əvvəlindən yeni elektron xidmətlər göstərməyə başlayacaq.
"Azerpocht" DM strukturunun tərkibinə 59 poçtamt, iki poçt müəssisəsi, iki törəmə müəssisə və səkkiz rabitə qovşağı daxildir.
Azərbaycanın bütün yaşayış məntəqələrini əhatə edən DM strukturunun tərkibində 1,3 mindən çox poçt müəssisəsi fəaliyyət göstərir.