Azərbaycan, Bakı, 15 sentyabr/ Trend , müxbir S.Babayeva/ Koreya və Azərbaycanın Poçt Administrasiyaları əməkdaşlıq haqqında memorandum imzalayacaqlar. Bu barədə qərar bazar ertəsi, Koreya Respublikasının ticarət, sənaye və enerji məsələləri üzrə Azərbaycandakı attaşesi Taek Yeon Ço və "For your" Azərbaycan-Koreya Birliyinin prezidenti David Çoinin Azərbaycan Rabitə və İnformasiya Texnologiyaları Nazirliyinin "Azerpocht" Dövlət Müəssisəsində (DM) görüşlərinin yekunları üzrə qəbul edilib.
Sənədin imzalanacağı dəqiq tarix açıqlanmır.
Rabitə Nazirliyinin verdiyi məlumata görə, nümayəndələr Koreya Poçtunun "Azerpocht" DM ilə əməkdaşlıqda maraqlı olduğunu bildiriblər.
Koreya nümayəndə heyəti Azərbaycanda həyata keçirilən maliyyə xidmətlərinin inkişafı layihəsi barədə məlumatlandırılıb. Bu layihənin əsas komponenti maliyyə xidmətlərinin göstərilməsi üçün ölkənin poçt sahəsinin təkmilləşdirilməsindən ibarətdir.
