Azərbaycan, Bakı, 12 noyabr/ Trend , müxbir S.Babayeva/ "Azərbaycanın milli rabitə peyklərinin buraxılması çərçivəsində? şirkət seçimi üzrə tender qapalı keçirilə bilər" - çərşənbə günü ölkənin rabitə və informasiya texnologiyaları naziri məlumat verib.
" Tender elan edənədək biz maraqlı şirkətlərlə danışıqlar aparırıq" - Abbasov deyib: "Bu cür danışıqlar ABŞ, Türkiyə və İsrail şirkətlərilə aparılır".
Nazirin sözlərinə görə, üstünlük münasib şərtlərlə keyfiyyətli xidmət təklif edən şirkətə veriləcək: "Bununla yanaşı, şirkətin təmsil etdiyi ölkə ilə qarşılıqlı əlaqələr də nəzərə alınacaq".
Rabitə naziri milli rabitə peyki - Azersat-ın istehsalı və buraxılması üçün müqavilənin imzalanma ehtimalını istisna etmir. Amma bu sənədi imzalayacaq əcnəbi şirkət podratçılarla peykin hazırlanmasına və buraxılmasına hazırlıq və yerüstü stansiyanın qurulması barədə sazişləri özü imzalamalıdır.
AzerSat layihəsinin dəyəri 200 milyon dollar civarında dəyərləndirilir. Peykin əhatə dairəsinə Avropanın və Asiyanın bir hissəsinin - Qazaxıstanın, Türkmənistanın və İranın da daxil olacağı güman edilir.
Nazirlikdə hesab edirlər ki, peyk 2010 - cu ildə buraxıla bilər. AzerSat - ın istismar müddəti 18-19 ildir.
Azərbaycan prezidenti İlham Əliyev noyabrın əvvəlində ölkədə kosmik sənayenin yaradılması və telekommunikasiya peyklərinin orbitə buraxılması barədə sərəncam imzalayıb. Sənəddə qeyd olunur ki, Azərbaycanın əlverişli coğrafi mövqedə, Avropa ilə Asiya arasındakı iqtisadi məkanda yerləşməsi iqtisadi və informasiya təhlükəsizliyinin əsas komponenti olan telekommunikasiya peyklərinin yaradılmasını və onların orbitə buraxılmasını zəruri edir.
Sərəncama əsasən, ölkədə yüksək texnologiyaların tətbiqini və kosmik sənayenin yaradılmasını sürətləndirmək üçün Nazirlər Kabineti üç ay ərzində kosmik sənayenin yaradılması və inkişafı üzrə Dövlət Proqramını hazırlayıb, prezidentə təqdim etməlidir.
Telekommunikasiya peyklərinin orbitə buraxılması üçün müvafiq tədbirlərin həyata keçirilməsi Rabitə və İnformasiya Texnologiyaları Nazirliyinə tapşırılıb.