Azərbaycan, Bakı, 17 dekabr/ Trend / Azərbaycanın Rabitə və İnformasiya Texnologiyaları Nazirliyi yanında İnternetin İnkişafı üzrə Koordinasiya Şurası "Azərbaycan Respublikasında dövlət kodları ilə domenlər üzrə qaydalar" layihəsini ilkin olaraq təsdiqləyib.
"Şuranın üzvləri sonuncu görüşdə konstruktiv təkliflərlə çıxış ediblər, yekunda qaydalar layihəsinin ümumi təqdiri bəyan edilib", - Rabitə Nazirliyinin məlumatında deyilir.
Koordinasiya Şurasına Azərbaycanın rabitə və informasiya texnologiyaları nazirinin müavini Elmir Vəlizadə rəhbərlik edir.
Şuranın funksiyalarına Azərbaycan ərazisində İnternetin inkişafı üzrə tədbirlər, domenlərin qeydiyyatı, istifadəsi, bu sahədə fəaliyyət göstərən idarələrə elmi-metodiki yardımın göstərilməsi daxildir.
"Azərbaycan Respublikasında dövlət kodları ilə domenlər üzrə qaydalar" "Telekommunikasiya haqqında" Qanunun 7.10 maddəsinin yerinə yetirilməsi və beynəlxalq domenlərin qeydiyyatı normalarına uyğunluq məqsədilə işlənilib.
