Azərbaycan, Bakı, 26 avqust / Trend , müxbir H.Vəliyev /
Yunanıstanda avqustun 28-29-da Azərbaycanın poçt operatoru "Azərpoçt" MMC-nin Avtomatlaşdırılmış Korporativ İnformasiya Sisteminin (AKİS) yaradılması layihəsi üzrə rəhbər komitənin iclası keçiriləcək. Bu barədə MMC-nin məlumatında deyilir.
Rəhbər komitənin tərkibinə Azərbaycanın Rabitə və İnformasiya Texnologiyaları Nazirliyinin, Mərkəzi Bankın, "Azərpoçt" MMC-nin, Hewlett-Packard, Sinam və Colvir şirkətlərinin nümayəndələri daxildir.
"Azərpoçt"un məlumatına əsasən, görüş zamanı tərəflər layihənin gələcək realizasiyası üzrə strateji məsələləri və cari vəziyyəti müzakirə edəcəklər. Görüşdə mütəxəssislər AKİS modullarının təqdimatını keçirəcəklər və poçt xidmətlərinin əsas xüsusiyyətlərindən danışacaqlar.
AKİS-in ilk sınaq işləri "Azərpoçt" MMC-nin 1 saylı poçt filialının 10 saylı poçt şöbəsində keçirilib. Real vaxt rejimində şəhər telefon ödənişlərinin qəbulu üzrə ilk əməliyyatlar həyata keçirilib. Eyni zamanda, APUS sistemi ilə ödənişlərin qəbulu əməliyyatları üzrə test işləri həyata keçirilib, həmçinin APUS və AKİS arasında informasiya mübadiləsi təchiz edilib.
Avtomatlaşdırılmış Korporativ İnformasiya Sistemi tam şəkildə sentyabr ayında istismara veriləcək.
Məqalə müəllifi ilə əlaqə ünvanı: [email protected]