Azərbaycan, Bakı, 22 oktyabr / Trend , müxbir H.Vəliyev/
ABŞ-ın Orbital Sciences Corporation şirkəti BakuTel-2009 Beynəlxalq Azərbaycan sərgisində Azerspace milli peykinin təsdiq edilmiş maketini təqdim edəcək. Bu barədə sərginin təşkilatçısı Iteca Caspian şirkətinin məlumatında deyilir.
Orbital Sciences Corp şirkəti yanvarda Rabitə və İnformasiya Txenologiyaları Nazirliyi (RİTN) tərəfindən elan edilən Azerspace peykinin yaradılması üzrə tenderin qalibi olub.
Peyk teleradio yayımında və internetdə ötürmə qabiliyyətinə malik olacaq. Avropa ölkələri və Asiya qitəsinin böyük hissəsi peykin əhatə zonasına daxil olacaq.
RİTN-in məlumatına görə, peykin dəyəri 163 milyon manatdır. Peykin yaradılmasına 87 milyon dollara yaxın pul xərclənəcək. Bundan əlavə, onun orbitə çıxarılmasına 40 milyon manat, peykin idarə mərkəzinin yaradılmasına isə 16 milyon manat vəsait xərclənəcək. Qalan 18 milyon manat isə peykin 100 faizlik sığortalanmasına sərf ediləcək.
Təsdiq edilən plana müvafiq olaraq, peykin 2011-ci ilin sonlarında orbitə çıxarılması gözlənilir. İlkin məlumatlara görə, peykin orbitə çıxarılması Baykonur kosmodromundan həyata keçiriləcək.
Peykin istismar müddəti 15 ildir. Qoyulan vəsaitin götürülmə müddəti isə 5 ildir. Azərbaycan peyk resursunun 25 faizindən istifadə etmək niyyətindədir. Qalan hissəsi isə digər ölkələrin operatorlarına təklif ediləcək.
Milli peyk ölkəyə keyfiyyətli və etibarlı əlaqələr təşkil etmək və teleyayım imkanı verməklə yanaşı, rabitə kanallarının sayını da artıracaq.
Məqalə müəllifi ilə əlaqə ünvanı: [email protected]
